Noordnederlandse Historiebijbel

Vijf capittel

Doe quamen alle die geslachten van Ysrahel in Ebron tot David ende seiden: "Wy sijn van uwen vleis ende van uwen been, mer gisteren ende eergisteren ende in voerleden tiden doe was Saul coninc over ons, mer gi waert die uutleder ende die inleder van Ysrahel." Doe maecte David vrede mit alle die van Ysrahel. Ende doe wort daer David dordewerf coninc gesalvet. Ende doe was David 30 jaer out.

Doe dancte ende lovede David Gode ende maecte dien psalm: Dominus illuminacio mea et salus mea quem timebo. Dominus protectio vite mee a quo trepidabo. Die Here is mijn verlichter ende mijn behouder die ic ontsie. Die Here is een bescermer mijns levens daer ic voer beve. Ende dien psalm al uut.

David was coninc 40 jaer lanc ende seven jaer ende 2 maenden over die van Juda ende 33 jaer over al die van Ysrahel.

Doe toech David uut Ebron voir Jherusalem ende dat noch die Yebuseen besaten. Ende hem wort noch geseit dat hi niet in die stede en ghinghe, eer die crepelen ende die blinden

[fol. 132vb]

in die stede vandaen waren. Doe was daer een Yebuseeus, hiet Ornam, die gaf David die nederstede op. Ende daermede behielt hi sijn lijf ende sijn guet. Ende die overste stede was starc. Doe geboet David, so wie die overste stede eerst bestrede, die soude sijn maerscalc wesen. Doe streken alle die stercste an die stede, mer Joab was voer ende wan die heerscappie ende bleef maerscalc. Ende si verslogen alle die Jebuseen. Ende David die bleef daerin wonende ende noemdese Jherusalem. Ende het wort gehieten Davids stat.

Doe began David een coninclike sael ende husinghe te maken an die een zide van Jherusalem an enen straet die Mello hiet. Ende daer vestede hi die stede mit enen stercken muer. Ende die coninc van Tyre, Hyram, die sende coninc David cederbomenhout ende tymmerluden ende stenen ende steenhouwers. Ende si volmaecten hem een huys. Ende in dat huys dat David doe dede maken, daer at Jhesus Cristus sijn Leste Avontmael opten Witten Donredach mit sinen apostolen.

Doe David machtich coninc was over al Ysrahel ende woende in Jherusalem, doe nam hi daer meer wiven ende biwiven. Ende van sinen getrouwede wiven worden in Jherusalem geboren dese kinderen, als Samua, Sodab, Nathan, Salomon, Ybaar, Helysua, Nepheg, Yaphya, Helysama, Heli\da

[fol. 133ra]

ende Helyfeleg.

Doe verhoerden die Filisteen dat David coninc gesalvet was over al Ysrahel; doe vergaderden si haer heer om jeghen hem te striden. Doe David dat verhoerde, hi vergaderde sijn volc ende toech jegen die Philisteen in Raphaym. Doe vraechde David God raets of hi jegen die Filisteen vechten woude. Hem wort geandwoert: "Trect daerjegen: God selse in uwen handen geven." Doe toech David mit sinen volc daerjegen ende hi versloechse. Doe seide David: "God die hevet mijn vianden voir mi versceiden, gelijc dat hi dat water versceide." Ende die Philisteen die lieten daer haer sulveren ende gulden goden. Ende die nam David ende voerdese in Jherusalem ende bracse te stucken.

Doe maecte David dien psalm: Domine, in virtute tua letabitur rex et super salutare tuum exultabit vehementer. Here, in uwer craften sel verblijt worden die coninc ende op u behout sel hi hem seer vervroechden. Ende voert dien psalm al uut.

Ende noch vergaderden die Philisteen weder in Raphaim. Doe vraechde David noch Gode raets, of hi jegen die Philisteen trecken woude. Hem wordt geandwoert: "Neen, trect niet jegen hem, mer ommeberinctse van afteren. Ende als gi een geluyt hoert, so gaet in dat volc ende strijt, want dan sel God voer uwen aensicht gaen ende

[fol. 133rb]

sal die Philisteen verslaen." Ende David dede also ende verjaechde die Philisteen van Gaza tot Gezer toe.

Doe dancte ende lovede David Gode ende maecte desen psalm: Confitebor tibi, Domine, in toto corde meo, quoniam audisti verba oris mei. Here, ic sel u belien in al mijnre herten; gi hebt gehoert die woerden mijns monts. Ende dien psalm al uut.