Noordnederlandse Historiebijbel

4 capittel

Salomon was coninc over al Ysrahel. Ende dit waren die princen die in sijn huys regierden - ende elc die hadde voel dienren onder hem: Azarias, Sachos zoen; Helyorefel, Ahya, dat waren princen van den scrivers; Josaphat was sijn glosierre, sijn voirspraec; Bananyas was sijn maerscalc van den princen; Sadoch ende Abyather waren priesteren; Asarias, Nathans soen, was prince over die camerlingen; Abya was een prince over dat huysgesin; Adonyram was prince over diegene die tribuyt ontfingen. Salomon die hadde 12 princen geordiniert in Ysrahel, die hem besorchden van al dat hem

[fol. 152vb]

noet was in sinen hove: van eten ende van drinken ende dat daertoe hoert. Ende elc prince besorchde hem een maent van dat binnen sinen hove was. Also besorchden si hem een jaer. Ende dit sijn die namen van den princen: Benhur in den berch van Effraym; Bendecer in Maecces, in Salebin, in Bethsemes, in Helon ende in Bethanon; Benesed in Arabboth ende in al dat lant van Ephet; Banabinadap in Ephtad in Dor Taphet; Bana in Tanao, in Maggedo ende in al dat lant van Bethsan; Bengaber in Ramoth in Galaad ende in al dat lant van Argob; - daer waren in 60 groter steden, wel bemuert; - Abynadap int lant van Manaym; Achymaas int lant van Neptalim; Banaa int lant van Azer ende in Balod; Josaphat int lant van Ysachar; Semey int lant van Benyamin; Gabar int lant van Galaad, int lant van Seon, des conincs van Amorreen, ende in Ogs lant, den coninc van Basan.

Ende int lant van Juda ende van Ysrahel daer waren die steden ontellic. Ende Salomon at ende dranc mit sijn gesin in groter genoechten ende mit rusten sonder oerloge ende sonder strijt, want hi hadde alle die riken onder hem. Ende al dat lant van der groter zee tot Egipten toe ende al dat volc brochten hem giften ende dienden hem sijn leven lanc.

Dit was dagelics die spise

[fol. 153ra]

die men in Salomons hof at: 30 hoet wittebroets ende 60 hoet tarwenbroets, 10 vette ossen, 20 ossen die men uut die weiden nam, ende 100 scapen, behalven herten ende hinden, bucken ende geyten ende ander wiltbraet ende vogelen. Ende menigertieren dranc die daer was ende menigertieren froyt ende cruyt en is niet te bescriven. Salomon die hadde 40.000 paerden die worden gevoet onder die 12 princen die voirscreven sijn. Ende hi hadde noch 12.000 rijtheynxten. Die sesdusent waren binnen Jherusalem ende die ander sesdusent stonden buten Jherusalem in die dorpen. Ende die 12 voirgenoemde princen mit haren gesin die besorchden alle die paerden coren ende voeder. Ende als Salomon ergent riden woude, so worden hem die paerden gebrocht na sijn begeert.

Ende Salomons wijsheit die ghinc boven die wijsheit van Orienten ende boven die wijsheit van Egipten. Oec ghinc hi in wijsheit boven die 4 vroeden van Moab, als Ethan, Heman, Calcal ende Dorda. Ende Salomon maecte een boec; daer stonden in 3.000 parabolen, als in leringhe na sedicheit ende eerbaerheit der werelt. Ende hi maecte een boec van vijfdusent carmina, dat sijn sangen of vaersen. Oec bescreef Salomon alle die natueren van den bomen die uut der aerden wassen. Ende hi bescreef die natuer van allen cruden die uut der aerden wasschen. Ende hi be\screef

[fol. 153rb]

die natuer van allen beesten, die dieren die opter aerden sijn. Ende oec bescreef hi die natuer van alle den vogelen in der luchten ende van den visschen in den water. Oec bescreef hi conjuracien daer men die duvelen mede verjaecht ende bint. Ende om sijn wijsheit willen so quam dat volc uut allen lande om sijn wijsheit te horen.