Oud-Vlaemsche liederen en andere gedichten der XIVe en XVe eeuwen
(1849)–Anoniem Oud-Vlaemsche liederen en andere gedichten–
AuteursrechtvrijIII. [Van drome so ghewaghic]Van drome so ghewaghic,
Van eenen man die zaghic
Verdoolt in erdscher weilde;
Hi sprac: ‘Hier in behaghic.’
Ic sprac tot hem: ‘Dat claghic.’
Maer doch hoe vast hi speilde,
Sijn spel nam end; hi queilde.
Vergheiten was sijn spel;
Tijt was verloren snel,
Natuere riep om troost,
De doot die croop int vel.
Hi sprac: ‘Nu zie ic wel
Wat mi ten laetsten noost,
Dats tijt verroukeloost.’
Vrienden ende maghen,
Ende die gheselscaps plaghen,
Die camen daer ghemeene;
Si mochten vaste claghen,
Maer die hem holpen draghen,
Van des hem ghinc te beene;
Daer vrienden vant hi gheene.
So sprac hi: ‘Tijt verliezer,
O weerelt vruechden kiezer,
| |
[pagina 381]
| |
O bliscap onghestade,
O duechdelic vervriezer,
O alder riezen riezer,
Wies wert di nu te rade,
O moeder gods ghenade.
Die zijn vrienden hieten,
Haer claghen dat zi lieten,
Doe zi sijn claghen hoorden.
‘Wi lettel hier bescieten,
Zeid zi, hem mochte verdrietenGa naar voetnoot(1)
De heere ghebood:
Ganc winnen tbroot,
Dat leven gheift;
Merc mijn bloet root
Di van der doot
Verresen heift;
Nu voort an leift.
Werp omme ende zay,
Niet of en dray,
Blijf bider plouch;
Ghef mi den may
Van vruechden vray;
Kies dijn ghevouch,
Ic hebs ghenouch.
| |
[pagina 382]
| |
Sie ic dat scenden,
Di in allenden
Wil erdsche weilde;
Ic zal di senden
Troost voor tverblenden.
Du best mijn beilde,
Daer ic om queilde.
Die horen heift hoort
Wat es tconfoort
Des heeren mijn,
Als weilde mi stoort
Hi rechte voort
Doet hulpe anscijn;
Want ic bem zijn.
De grote heeren
Haer vrienden eeren
Met haerre paruere,
Daer in zi leeren
Den staet vermeeren;
Voort wats ghebuere
Bereet ter cuere.
Der elnen vive
Sent men gherive
Den vrienden thuus;
Maer dat men blive
Bi metten live,
Om al refuus
Te doene confuus.
| |
[pagina 383]
| |
Die dit vertraechde,
Ens hem beclaechde,
De heere met rechte
Hi dien verjaechde;
Want de versaechde
Maect nu ghevechte
Bloot, stoute knechte.
Nu laet ons merken,
Leec metten clerken,
Ende alle te gader,
Of in ons werken
Ons wille ghesterken
De hemelsche vader;
Elc zi ghestader.
Vive elnen goet
Om ons behoet
God vrienden zendt;
Die die andoet
Als vrome moet,
Ende daer in endt,
Wert ridder gekent.
Van desen viven,
Men maecht wel scriven,
Drouch God een cleet,
Ende liedt ontliven,
Om ons kaytiven,
Hi daer in street;
Wel hem, diet weet!
| |
[pagina 384]
| |
Deerste es een ·L·
Het zonder spel
Lis, die bediedt
Strijt wreet en fel;
Vorziets hu wel
Die weilden pliet,
Van als ghesciet.
Dandere daer bi
Dat es een ·I·
Ictus, dats slach;
So waer strijt zi,
Slach dat es de cri,
Sonder verdrach;
Hoede hem die mach!
Daer bi hem beeden,
Heet zonder sceeden
Denudare,
Dat luut ontcleeden;
Die weilde leeden,
Merct denudare
Maect desolare.
De vierde een ·E·
Haer slach doet wee,
Dats Egestas,
Luut zonder mee:
Aermoede, als snee
Smelt zoe of glas,
Hoe rijc men was.
| |
[pagina 385]
| |
De vijfste die staet
Na toeverlaet
Necessitas,
Noot es de graet;
Merct die aenbaet
Der weilden pas;
Het es alst was.
Die dit cleet draghen
Sijn Christus maghen,
Ende broeders met;
Die mee wil vraghen,
Hem maech behaghen,
Si zijn sijn let;
Wat wilzi bet.
Die draecht dit cleet,
No cout, no heet,
Ne gheift hem helle.
Doet an ghereet,
Verwinnet cleet;
Daer weilde in qwelle,
Als vrom gheselle.
De name van desen
Dat mach wel wesen
Gheheeten Liden.
Van Gode ghepresen,
Ende uut ghelesen;
Die daer in striden,
In Gode verbliden.
| |
[pagina 386]
| |
Wie heeft den moet
Verduldich zoet,
God zal hem gheven
Te vruechden spoet;
Die nederst stoet
Wert hoochst verheven,
Dats hem bescreven.
Oyt zachmen in stride,
Hoe groot van nide,
Wie tzwert up stac,
Dat menne bevride
Ende voerde andzide,
Hem doende ghemac,
Wies hem ghebrac.
Wie lyet verwonnen
Men sal hem jonnen
Ghenade, hets recht;
Die niet en connen
Int licht der zonnen
Staen int ghevecht,
Elc gheve hem knecht.
Lof, hemels vader,
Die elc mader
Van binnen kent,
Weist voort onse pader,
Dat ons gheen quader
Ne werde ghesent;
Want wi sijn blent.
|
|