Princesse Liet-boec

Hero antwoort tot Leander [vertaling][editie]

Op de Stemme: Alst beghint (Die winter is ons verganghen)

Ghy cont u liefd vergheten
Als ghy rijdt en vliecht ter jacht
Maer wy niet anders weten
Dan te spinnen dach en nacht /
Mistroost denck ick door desen
Soo haest het weer wat stilt
Hy had hier moghen wesen
Maer hy heeft niet ghewilt.

Met veele droevighe clachten.
Gae ick dickmael aen strant /
Dick wacht ick heele nachten /
En ick steeck het licht aen brant /
Dickwils int fantesaeren /
Door lief des groot onrust
Worden u sachte cleeren /
In u plaets / van my ghecust.

Mocht ick u weer ontfanghen /
Ghelijck ick wel eertijts plach
Daer nae staet mijn verlanghen /
Wel menighen nacht en dach /
U liefde gaet my dwinghen /
Tot u liefd dit claech ick nu
Mijn praeten / couten / singen /
Is mijn lief altijt van u.

Altijt in mijn ghedachten /
Dunckt my schier dat ghy al swemt
Sal den slaep mijn druck versachten /
Den droom mijn hert beclemt
In u armkens seer lieffelijck /
Werd ick dunckt my ghecust
En nae u swemmen grieffelick /
Wert uwen brant gheblust.

Dat ick door wint en weder
U derf en is mijn gheen druck
Maer ick in liefden teeder /
Sorghe voor quaet ongheluck
Dats dat ghy yemant aerdich
Voor u lief sult aenslaen /
En my dan als onwaerdich
Sult vergheten en versmaen /

Waerom swemt ghy so traechlijck /
En verhoopt nae soeten tijt
Ben ick u noch behaechlijck
Hier te comen u toch vlyt /
Sorcht niet voort weder keeren
Het waey of het sy stil
Hier meucht ghy na begheeren /
Volbrenghen uwen wil.

Getrouwicheyt wilt betoonen
Edel prins weest niet te stout /
En wilt ghy uws niet schoonen
So schoont mijns / tonweder schout:
Het swemmen wilt wat staken
Op mijn leven doch let
En wilt u hert vermaken /
Door desen doch altemet.