Pseudo-Bonaventura-Ludolfiaanse leven van Jesus

Hoe Magdalena ende die ander Marien ten grave quamen. Dat .xxxviij. capittel

Als ic voer seit hebbe: Maria Magdalena ende die ander Marien ghinghen mit hoerre salven totten grave. Ende als si quamen buten der poerten der stat, so overdochten si die crucinghe ende die pinen hoers meesters, ende in allen steden daer hem yet merkelike ghesciede, stonden si een luttel ende bogheden hoer knien ende custen die aerde mit suchten ende weenden ende seiden: "Hier ontmoeten wi hem, als hi

[fol. 171v]

sijn cruce hadde op den hals ende sijn moeder half doot was. Hier kierde hi hem om totten wiven. Hier leghede hi sijn cruus weder of van moetheden ende ruste hem een luttel op desen steen. Hier stieten si hem wredelic, dat hi seer gaen soude ende dwonghen als te lopen. Hier ontcleden si hem ende naghelden aen den cruce". Doe vielen si neder mit groten roepen ende uutstortinghe der tranen in hoer aensicht, ende custen dat cruce dat noch roet was van sinen duerbaren bloede. Daer na stonden si op ende ghinghen totten grave waert ende seiden: "Wie sel ons of doen den steen vander doeren des graves?" Ende als si toe saghen, so saghen si den steen of ghedaen ende dien enghel ons Heren daer sitten, die seide: "En ontsiet ju niet", so als dat ewangelike woert begrijpt. Si waren bedroghen in hoerre hopen, want si dat lichaem ons Heren waenden vinden ende niet en mercten op die woerde des enghels, ende suchtende kierden si mit haesten weder totten discipulen ende seiden dat dat lichaem ons Heren ghenomen ware.

Doe liepen Petrus ende Johannes totten grave. Sich se nu wel aen, hoe si liepen. Magdalena ende hoer ghesellinnen liepen na hem. Si liepen alle

[fol. 172r]

om te soeken horen Heer ende hoer siele. Si liepen seer trouwelijc, seer vurichlic ende seer versaghet. Ende als si totten grave quamen ende daer in saghen, en vonden si niet dat lichaem, mar si saghen die linnen clederen daer hi in was ghewonden ende ghinghen en wech. Doech mit hem, want si in groter quellinghe sijn. Si soeken horen Heer ende en vindens niet, ende en weten niet, waer si hem meer soeken sullen. Daer om ghinghen die discipulen droeflijc ende wenende en wech.

Ende die Marien bleven noch daer, ende inden grave siende saghen si twe enghelen mit witten clederen, die seiden: "Wat soecti den levenden mitten doden?" Ende si en mercten noch die woerde niet noch en ontfenghen ghenen troest daer of, dat si die enghelen saghen, want si gheen enghelen en sochten, mar den Heer der enghelen. Ja, die twe Marien worden so vervaert, dat si een stuc ghinghen vanden grave ende ghinghen droeflijc neder sitten.