Pseudo-Bonaventura-Ludolfiaanse leven van Jesus
(1980)–Anoniem pseudo-Bonaventura-Ludolfiaanse leven van Jesus–
Auteursrechtelijk beschermd
[Folio 174r]
| |
stat quamen, openbaerde hem onse Heer ende seide: "God gruet ju". Ende si worden meer dan men segghen mach verblijt ende vielen neder ende hielden sine voete ende mit groter bliscappen spraken si onderlinghe ende maecten hier oec een groet Paesschen. Onse Heer Ihesus hem doe seide dat si sinen broeders segghen souden dat si ghinghen in Galileen; daer souden si hem sien, so als hi hem voer seit hadde. Doe quam Magdalena mitten anderen Marien ende seiden dit den discipulen. Sich hoe dat die meester der oetmoedicheit sine jonghers hier hiet sijn broeders. Nie en liet hi dese doghet. Totter doot toe heeft hi hoer trouwe ghehouden ende nader doot ende oec na sijnre opvaert. Ende en dwoech hi niet inden eynde die voete sijnre jonghers? En oetmoedichde hi hem niet meer dan men spreken mach in dat liden des crucen? En liet hi hier niet, als du ghehoert hebste, sijn jonghers sine broeders te wesen? En sprac hi niet na sijnre opvaert tot Paulus oetmoedelike als tot sinen ghelike: "Saule, Saule, waer om persequierstu mi?", ende hi en hiet hem niet God te wesen, mar Ihesum. Ende en sel hi inden stoel der majestaet sittende niet segghen inden oordel: "Also langhe als ghijt enen van desen minsten | |
[Folio 174v]
| |
minen broeders doet, so doet ghijt mi." Sonder sake so en heeft hi dese doghet so seer niet ghemint, want hi wiste, so als beghin ende fundament alre sonden hoverdie is, dat so oetmoedicheit beghin is alles guets ende salicheden, sonder welc fundament te vergheefs enich tymmer ghemaect wart. Waer bi du noch van reynicheiden noch van armoeden noch van enigher doghet of van enighen werke betrouwen mochste sonder oetmoedicheit. |
|