Pseudo-Bonaventura-Ludolfiaanse leven van Jesus

Hoe hi hem openbaerde opten berch van Thabor. Dat .xlviij. capittel

Hier na, doe die jonghers ghinghen totter voerseider stede, openbaerde hem anderwerve onse Heer Ihesus ende seide:

[fol. 180r]

"Alle macht is mi ghegheven inden hemel ende inder aerden. Gaet ende leert al dat heydensche volc ende doeptse inden name des Vaders, des Soens ende des Heilighen Gheests, ende leert hem dat si houden al die dijnghe die ic ju gheboden heb, ende hebt ju starckelic, want ic mit ju bin alle daghe totten eynde der werelt." Si aenbeden hem in sijnre coemst ende staen mit hem nu oec in groter bliscap. Merc si nu wel ende dat hem nu toe gheseit is, want het sijn zeer grote dijnghe. Want hi doet hem kondich, hoe dat hi Heer is al der werelt; hi gheeft hem een ghebot te prediken ende hi gheeft hem een forme des doepsels ende hi ghevet hem alte grote craft in dien dat hi seide, dat hi alle tijt mit hem sel wesen. Sich hoe grote bliscap hi hem gaf ende hoe veel teyken der minnen hi hem toende. Daer na gaf hi hem die benediccie ende scheide van hem.