Der IX quaesten

[fol. A2r]

¶Vanden coninc. Iheroboam. een coninc.
ouer Israhel. ghecoren daer toe van god
biden propheet Achias. mer wert namels weder
vanden here verworpen om sijnder sonden wille.

Coninck Salomon die sone van Dauid, siende dat Ieroboam zijn dienaer een schoon starck iongelinck was ende van groter wijsheyt so stelde hi hem een ouerste ouer die tributen vanden geslachte van Iosep. So ghebuerdet op een tijt dat Iheroboam ghinck wt Iherusalem, ende hy vant inden weghe den propheet Achias die gecleedt was met eenen nieuwen mantel, ende si twee waren alleen op dat velt. Ende die propheet Achias nam sinen nieuwen mantel ende sneet den in .xii. stuc-

[fol. A2v]

ken. ende doe seyde hi tot Iheroboam, neemt voor v die x. stucken. Dit seyt die heere die god van Israhel. Ic sal afsnijden van die macht desconincs Salomons dat rijck, ende ic sal v gheuen die .x. geslachten van Israhel. ende ic sal hem laten die ander om mijnen knecht Dauid, ende de stadt van Iherusalem de ic wtuercoren hebbe. Ende dit sal ic doen om dat hy mi ghelaten heeft, ende heeft aenghebeden Astherten die goddinne der Sirien. ende Chamos den god der Moabiten. ende Moloch den god van den kinderen van Amon. ende dat hi niet en wandelt in mijnen weghen, noch en doet niet na mijnen gheboden, ghelijck sijn vader Dauid ghedaen heeft Ende ick en sal van hem niet nemen al dat rijck, om mijnen knecht Dauid sinen vader dien ick vercoren hadde, ende dye mijn gheboden bewaerde. Ende ic sal v aennemen seyt de here ende god van Israhel, ende ghi sult regneren ouer al dat v herte begheert. ende ghi sult coninc sijn ouer Israhel Ende ist dat ghi wandelt in mijnen weghen, ende doet dat recht is in mijnen oghen, ende bewaert mijne geboden, so sal ic met v sijn, ende ic sal v timmeren een ghetrouwe huys als ic ghedaen hebbe mijnen knecht Dauid. Ende ic sal v leueren Israhel, ende ic sal slaen dat saet van Dauid, mer niet altijt. Dit vernemende Salomon wilde Iheroboan doden. Doen vloet Ieroboan in Egipten by den coninc. Sesack coninc. van Egipten. daer hi bleef tot na der doot van Salomon, die ouer Israhel gheregneert hadde .xl. iaren. Na die doot van Salomon vergaderde al dat volck van Israhel om Roboam coninc. te maken den

[fol. A3r]

sone van Salomon. Ende Iheroboan was doe comen wt Egipten, ende hi ghinck metten volck van Israhel bi Roboan ende seyde, V vader heeft swaren ende bitteren last op ons gheleyt, wilt dien verminderen ende wij sullen v dienen. Doe antwoorde Roboan Gaet elck thuys tot ouer de derden dach, ende comt dan weder ic sal v antwoorde segghen.