Der IX quaesten

¶Hoe die coninginne ginc biden prophete Achias

Abias die sone vanden coninc. Iheroboan wert sieck in dien tijden, Doe seyde die coninc. tot zijnder vrouwen, doet ander cleder an, ende gaet in Sylo totten propheet Achias die mi seyde dat ic regneren soude, ende neemt met v.x. broden ende een vat honichs hi sal v wel seggen hoe dattet met onsen sonde sal zijn. Ende die vrouwe dede alsoe, ende quam totten prophete die so oudt was dat hi niet wel en sach, mer die here seyde tot hem. Siet dit is die huysvrouwe van Iheroboan, si sal v raet vragen van haren sone die sieck is. Als Achias nv een in sijn duere hoorde gaen so seyde hi Comt in vrouwe van Iheroboan; ic ben tot v gesonden om een sware bootscap te doen. Gaet

[fol. B1r]

ende segt Iheroboan, dit seyt de here Ic heb v gemaet een hertoch ouer mijn volck ende ghi hebt mi versmaet ende verworpen, ende hebt afgoden angebeden, daerom sal ick Iheroboan slaen ende al sijn mannen. ende die verslagen werden in die stadt, die sullen eeten dye vogelen der lucht, dit seyt die heere. Daerom gaet tot v huys. ende als ghi daer sult comen so sal steruenv sone, ende hi alleen sal begrauen werden vanden gheslachte van Iheroban. Ende die here sal stellen een heere ouer Israhel, dye sal verslaen dat huys van Iheroboan metten sinen, ende hi sal dye van Israhel wtwerpen van dit goede lant, om dat si afgoden gemaect hebben, ende hebben hem getarget, ende hi sal Israhel leueren om die sonden van Iheroboan, die gesondicht heeft, ende heeft dat volc doen sondigen. Ende doen ghinc die vrouwe wech ende als si quam op haren durpel vanden huise so sterf haer sone ende wert begrauen Als Iheroboan geregneert had xviii. iaren ouer Israhel. ende Abias die sone van Roboan regneerde ouer Iuda, en Benyamin. Welcke Roboan had ghetrout .xxviii. huysvrouwen. ende had lx. concubinen. ende hi had .xxviii. sonen. ende .lx. dochteren. Ende bouen hen allen stelde hi ouerste sinen sone Abias die coninc. wert. ende had vergadert .xl.m. strijtbaer mannen. Ende daer teghen bracht Iheroboan .lxxx.m. starcke mannen. Ende Ieroboan deylde sijn volck ende hi omghinc Abias volck van achter ende van vore. Dit siende de van Iuda riepen totten heere, ende die priesteren bliesen haer trompetten, ende dat volc van Iuda riepen ouer al Doe sandt God den anxt ende vrese op Iheroboan ende op

[fol. B1v]

al dat volck van Israhel die daer waren teghen den coninc. Abiam, ende Iuda, ende si vloeden wech, ende god leuerdese in de handen van Iuda ende sijn volck. Ende die coninc. Abias sloechse, ende daer vielen ghewont van Iheroboams volck ghewont .xl.m. starcke mannen. Ende die conincs. Abias vervolchde den vlienden coninc. Iheroboan. ende nam sijn steden, ende sijn dochteren. Ende in dien dage en conde Iheroboan niet wederstaen die macht vanden coninc. Abias. Ende die heere sloech Iheroboan ende hi sterf.