dat ghy Guido u dienaer ende mijn geselle wil gheven t'gheene dat ick ghewonnen hebbe, want het een getrouw duechdelijck ridder is, ende door hem ben ick eerst in de kennisse van uwen houe gecomen. De Coninc dit hoorende en conde hem niet ghenoech verwonderen ende zeyde: Ick hadde ghemeent dat ghy hier by my int lant soudet gebleven hebben, maer ick mercke nu wel dat u meninghe niet en is om hier te blijven? Heer Ian antwoorde: Heer Coninck by uwen verlove zoo begeer ick altijdt u dienaer te zijn, maer ick ben zoo veel inden selven Ridder ghehouden, dat ick hem nimmermeer ghenoech voldoen can. Doen beval hem de Coninck een weynich te vertrecken hy zoude hem met zijn Heeren beraeden. Daer nae sprack de Coninc tot zijn Heeren ende zeyde: Ick zoude uwen Raet in dit stuck wel behoeven, overmidts dat ick den ridder een bede gheconsenteerdt hebbe, de welcke ick hem behouden mijnder eeren niet weygeren en can, ende het is ooc mijn meninge niet, maer om dat hijt voor een ander begeert zoo ben ic in twijfelinge hoe ick best hier inne leven sal. Daer waren sommighe Heeren die meenden datmen hem de bede weygeren mochte ouermits dat hijse voor hem selven niet begeert en hadde ende zeyden: Het en is gheen cleyn sake sodanigen gifte wech te gheven, het ware ghenoech al waerdt eens Hertoghen oft Coninck zone. De Hertoch van Suffock stont op ende zeyde: Ghy heeren ick gheloue dat warachtich is tgeene dat ghy segt Maer wy moeten aenmercken de woorden die ons Coninck ghesproken heeft ende den selven ridder ghelooft, indien hy den Ruese verwonne, t'welck niemandt van ons allen heeft dorven bestaen, by avontueren zijn hert is andersins oft hy heeft zijn trouwe elders gelooft ende indient zoo is, zoo doet hy eerlijcken daer inne, hy moet van grote afcoemsten zijn, dat hy dese gifte zoo cleyn acht, ende daer hy zijn leuen zo ghewillich gheavontuert heeft, wie weet wat hem daer toe porrende is, dat hy de landen aldus versoeckt.
Daeromme zoude ick raden, datmen den Ridder zijn bede volbrocht, want wy den anderen Edelman wel kennen voor een duechdelijcken Ridder, ende door zijn eerlijcke daden heeft hem ons Coninck Ridder gheslaghen, ende in zijn Hof zo lange onderhouden. Doen dit de ander Heeren hoorden sweghen zy alle stille. De Coninck dit hoorende zeyde: Ghy Heeren my dunckt, voor tbeste datmense hier beyde by een ontbiede, ende hoorense spreken, twelck terstont ghedaen wert. De Coninc heeft heer Ian aenghesproken in deser manieren, Heer Ridder ick heb my met mijn heeren beraden opt stuck dat wi u voor ghehouden hebben, ende ouermits dat ghy begheert het loon twelc ghy ghewonnen hebt ende u ghegont wordt, deesen Ridder u mede gheselle ouer te geven, zo moeten wy hier inne te vreden zijn, tghene dat ick ghelooft ende gheswooren hebbe begeer ick niet te wederroepen. Ende voort zeyde de Coninc totten anderen ridder Guido, het is u een salighe ure gheweest dat dese Ridder eerst met u kennisse ghemaeckt heeft, want hy in uwen handen heeft ghestelt tgheene dat hy door zijn vromicheit ghewonnen heeft ende zijn leven daeromme gheavontuert. Daeromme gheve ick u nu voor alle dese Heeren mijn suster Clarisse tot eenen wijve, ende daer toe thertochdom van Cloucestre. Guydo dese woorden hoorende, viel op zijn knien voor den Coninck, danckte hem vander schoonder presentatien ende zeyde: Heer Coninck dat uwer ghenaden my nu presenterende zijt en can ick nimmermeer verdienen, de Heere verleen my gratie dat ict verdienen mach. Daer na keerde hy hem tot zijnen geselle ende zeyde
Auteursrechtvrij