|
| |
Van
Bacchus alder dronckaerts Godt
Die menigh mensch maect tot een sot.
Bacchus spreeckt tot zijnen dienaers.
Ic
Bacchus de Wijn God excelent,
Ben by den Griecken seer wel bekent,
Aldaer ic den wijn alder eerst vandt,
Noch onbekent in ander Landt,
Aldaermen my ooc Bier brouwen sagh,
Waer mede men my oock dienen magh
Merckt elc die wil mijn dienaer zijn,
Ende wandelen wil nae die Leere mijn.
Voor eerst moet hy hem gheheel vertien,
| |
| |
Van al dat voor recht is aenghesien,
Daer nae van alle deucht en eere,
Van alle vroomheyt en goedeleere
Die tot wijsheyt en conste leydt,
Oft tot voorsinnicheyt bereydt,
Ooc moet hy hem wel wachten sterck,
Van alle profijt ende goet werck,
Van alle schaemte, kuysheyt, oft goet,
Welc tot eerbaren staet comen doet,
Maer hy sal gaen in een snoot slecht cleet,
Altijdt besich int Bier ghereedt,
Ende inden Wijn, tzy wit oft root
Soo mach hy my daer dienst doen groot.
Op geen huysraet hy achten sal,
Dan op bier wijn boven al,
Ter Marcktwaert sal hy eerst loopen,
Om alle ding in huys te copen,
Als hy niet langher en mach onberen,
Al dat hy coopt sal hy verteeren,
Ende alsoo langhe alsmen wil borghen,
En sal hy voor gheen betalinghe sorghen,
t'Zy Broot, Vleesch, Boter, wijn oft Bier,
Hout, Zout, Visch, Kaes of eenigh Dier,
| |
| |
Hy moetet al borghen oft geuen pandt,
Heeft hy ooc huys oft eenich Landt,
Dat hy belaste meer dan tweert // is,
Ende smetse soo langhe tot dattet verteert // is
Hy en moet oock niet sorghen om te winnen,
Maer hem verlaten op zijns wijfs spinnen,
En 't tgeldt eer't verdient is te ontfanghen,
Maer ick duchte hy en soude niet vanghen,
Ende als hy hem vint op de Bier-banc,
Soo sal hy daer sitten heele nachten lanc,
Oft alsoo langhe alst geldt ghedeurt,
Ende ist dattet dan somtijts ghebeurt,
Dat v geldt uyt is, soo dickwils sal,
Laet dan daer v Tabbert groot en smal
Ende ist daer mee noch niet ghedaen,
Soo sal hy om sijns wijfs cleet gaen,
Om te betalen sijn ghelagh,
Sonder te aenmercken alle t'gheklagh,
Van wijf of kindt, maect zys te veel,
Soo grijpe hijse by die keel,
Ende doe haer dat klapspaen stille staen,
| |
| |
Al soude zy oock sijn vuysten ontfaen,
Ende ist kleedt beter dant ghelagh,
Soo drincke hy voort sonder verdragh,
Tot dattet al ruym is verteert,
Want sulcken dienst mijn hert begheert,
Het Wijn-huys is die Tempel mijn,
Aldaer ic meest ghedient wil sijn,
Maer sulcken dienaer mijn best behaeght,
Die voor die mette sorge draeght
Niet te min hy my ooc verblijdt,
Die daer zingt Completten en Vespertijt,
Maer wilt daer yemant scheyden van,
Die offer my eenen vollen man,
Herseloos, sonder rock oft kap,
Ende make op straet een groot gheklap,
twelck hy noch niemant en verstaet,
Die oock niet en weet waer hy gaet,
Maer is van leden alsoo zwanck
Soo dat hy om gaen is al te kranc,
Op straet in die goot is mijn Paradijs,
Aldaer mach hy slapen nae zijn advijs,
Als hy onslaept dan sal hy gaen,
Ende weder te drincken kloeck bestaen
| |
| |
Gaen daer sitten als een bestiert kalf
Sonder ghehelen zin noch half
Alle die dit dagelijcx doet met accoort,
Die dient my recht alsoot behoort,
Ic gelone hem nae zijn wercken,
Voor eerst geue ick hem wilt hier op mercken,
Een ydele borse eenen vollen // krop,
Hersseloose zinnen, eenen dollen // kop,
Veel fantasyen, een corte ghedachte,
Beuende leden, berooft van crachte,
Een plomp verstant, een kranc gesichte
Veel ydel gheclaps, sonder gewichte,
Oncuysch begheeren, daer toe gheen macht,
Om veel onreyns te klappen bracht,
Tot wijf en kint, wreet, straf en stuyr
Veracht, bespot van sijn ghebuyr,
Ooc gheven ick hem een dwaes ghebaren,
Om ionge kinderen te vervaren
Met hem houdende haer spot,
Als of hy ware dul en sot,
Want hy sal leelijck int aensien wesen,
Als een Lazurus onghenesen
| |
| |
Een roode neuse, en lopende ooghen,
Vroeghen ouderdom, een kleyn vermoghen,
Wanckelbaren gangh en krancke lenden
Die hy met pijne sal om wenden,
Voort gheve ick hem een korte borst
Een keele altijt ghequelt met dorst,
Een maghe die seer qualijck verteert
Met wat spijse hy hem gheneert,
Een inghewant gheheel ontstelt
In den buyck met pijn ghequelt,
Noch gheue ick hem asem met stanck
Ooren die maecken groot gheclanck,
Soo dat hy qualijck hooren kan
Wie dat hem toe spreeckt Vrou oft Man,
Een stroyen bedde, een ydel huys
Daer nochtans in groeyt menigh luys,
Die met hem sullen maken goet chier,
Het wert al meest zijn beste dier,
Want is daer yet in huys gebleuen
Hy moetet al voor schult wtgheuen,
Maer blijft hem van zijn huysraet yet
Dat is den bed-stock, ende anders niet,
Om daer op vast te moghen lenen
Als hy al heel kreupel gaet steenen,
Want dien hem seer wel dienen sal
Om hem te wachten vanden val,
| |
| |
Dien laet ick hem wt groot ghenae
Op dat hy my noch dienen na,
Kan hy noch ergens wat verweruen
Tot dat hy snoot katijf gaet steruen.
Dit is van mijnen dienaers tloon
t'Welck ick haer gheue goet en schoon,
Hier mede bewijs ick de danckbaerheyt mijn
Tot elck die wil mijn dienaer zijn,
Nochtans d'een meer en d'ander minder
t'Is oock meest goet van hare kinder,
Hoe wel de schrift waerschout waerlijck
Segghende: die mijn bemint en wort niet rijck,
Oock seyt Christus noch onghespaert:
Wacht v dat ghy niet en wort bezwaert,
Met dronckenschap, ofte gulsicheydt
Oft met des werelts sorghvuldicheydt,
Paulus seyt oock: wilt v niet gheuen
Door den Wijn tot een droncken leuen,
Want sulck een leuen is onghereghelt
t'Welck met Wijn wort beseghelt,
Noch seyt hy dat gheenen dronckaert
Gheen deel en heeft in Gods Rijck vermaert:
| |
| |
Noch straft de Schrift dickwils seer fijn
Te vergheefs zy alle dienen mijn,
Te vergheefs segghe ick, want den raet
Van
Epicurus leckere staet:
Is veel beter, Noch spreken van my
Alle heydensche Poeten vry,
En zy verheuen mijnen loon
t'WeIck ick hier hebbe verhaelt schoon,
Ende vertellen te recht mijnen aert
Op dat van my elck sy vervaert,
Maer sy doen al arbeydt verlooren
Want menigh Man heeft my wtvercooren,
Tot zijnen Godt, ende dient my kloeck
In allen Lantschap, ende hoeck,
t'Zy in hoghen oft in laghen staet
Elck gaerne tot mijnen dienste gaet,
t'Zy Keyser, Coning, Grave oft vorst
Paus, Paep, en Monnick na my dorst,
Ridder, Burgher, Coopman, Lantsknecht
Vrou, Hantwercker, Dienaer slecht,
Lantman, Schipman, ende Waghenaer
Doen my ghetrouwen dienst eenpaer,
Nacht, ende dagh, na mijn ghebodt
| |
| |
Want t'is haer ernst, ende gheen spot,
Ende elck die my best dienen can
Die houtmen voor eenen kloecken man,
Hoe wel daer veel met schande steruen
Die geern mijn rijck souden beerven,
Den Hang dief heefter my ghenomen
Meer dan thien duyst die niet weer en comen
Door mijnen dienst wort sond' vermeert
En deught ghehaet, Oock zonde gheeert,
Zodoma door mijnen dienst versanck
Die ick tot
Venus werck bedwanck,
En door mijn dienst t'volck van Israel
Maeckten voor t'gulden Kalf haer spel,
Twee en dertich Coninghen groot
Met Benedab bleven oock doot,
Door mijnen ghetrouwen dienst vereert
Was Holofernes hooft gheweert,
Al daer Asuerus my diende in huys
Worde de Coninghinne Vasthi confuys,
Oock was onthooft den vromen sint Jan
Aldaer Herodes my diende als een man,
Noch wert door mijnen dienst vergheuen,
Keyser
Claudius verheuen,
| |
| |
Vitellius quam oock in ween
Is door mijnen dienst ghedeelt in tween.
Int Kersten lant ben ick oock Heere
Want men dienter my hoe langher hoe meere,
In alle staten sonder ghetal
Die ick al te samen in schrijven sal,
In mijn Register jong en oudt,
Daer haer namen zijn menighfout,
Op datse souden moghen varen
Nae haren doot met mijne scharen,
Wt desen ellende int thracen landt
Daar ickse ontfanghe metter handt,
By t'suyuer bier, ende wijn verschaelt
Int huys van Nobis sterck vertaelt,
Ende drincken daer Solpher, ende Peck
Ende zijn der booser gheesten gheck.
Soo wie dan geerne by ons wil zijn
Die drincke hem droncken van bier oft wijn,
Als een zeughe met vollen back
Soo comt hy haest mee onder ons dack.
|
|
Auteursrechtelijk beschermd