De Vorsterman Bijbel

§ Dat xlvi. Capittel.

1

⁺ISrael reysde henen met alle dat hi hadde, ende als hi ^* totten put des eedts) quam offerde hi offer, den Gode zijns vaders Isaac

+ A

* thebre. tot Bersaba.

2

Hi hoorde dat hi hem des nachts riep in eenen visioen seggende, Icaob, Iacob, Hi antwoorde, Siet, hier ben ick,

3

Ende God sprack Ick ben die stercke Godt ws vaders, En vreest niet in Egypten te trecken, want aldaer sal ick v tot eenen grooten volcke maken,

4

Ick sal met v aftrecken, ende sal v oock hier wederom brengen, ende Ioseph sal zijn handen op uwe ooghen legghen.

5

Ende Iacob stont op vanden put des eedts ende Israels kinderen voerden haeren vader met haeren kinderkens ende wiuen, op de waghenen die Pharao ghesonden hadde, om den ouden man ende al dat hi besadt te voeren

6

Ende namen haer vee ende haue, die si in dat landt Canaan verworuen hadden, ende quamen alsoo in Egypten,

7

⁺Iacob ende alle zijn zaet met hem, zijn kinderen, ende zijn kintskinderen met hem, zijn dochteren, ende zijnder kinderen dochteren, ende alle zijn zaet.

+ B

8

Dit zijn die namen der kinderen van Israel die in Egypten quamen, Iacob ende zijn sonen, Die eerste geboren Iacobs sone Ruben

9

Rubens kinderen Enoch, Phalu, Efron, ende Charmi.

10

Simeons kinderen Iemuel, Iamin Ohad, Iachin, Zohar, ende Saul, die sonen vanden Cananeetschen wiue.

11

Leui kinderen Gerson, Chahat ende Merari.

12

Iudas kinderen Her, Onam, Sela, Phares, ende Zara, Maer Her ende Onam storuen int laet Canaan. Ende Phares kinderen zijn dese Eszron ende Hamul.

13

Isachars kinderen Thola, Phua, Iob ende Semron.

14

Zabulons kinderen, Sared, Elon, Ialeel,

15

Dat zijn Lea kinderen, die si Iacob baerde in Mesopotanien, met zijnder dochter Dina, die maken alle te samen met sonen ende dochteren, drie ende dertich zielen.

16

Gads kinderen Ziphion, Aggi, Suni, Ezebon, Eri, Arodi, ende Areli.

17

Asers kinderen Iamne, ⁺ Iesua, Iesui, Bria ende Sara haer suster. Ende Bria kinderen Heber ende Malchiel,

+ C

18

Dat zijn Selpha kinderen, die Laban ghaf Lea zijnder dochtere, ende dese baerde si Iacob dese sesthien zielen.

19

Rachels kinderen Iacobs wijf, Ioseph,

[p. c7r]

ende Beniamin,

20

Ende Ioseph werden gheboren in Egypten lant Manasse ende Ephraim die hem baerde Assenath, dye dochter Putipharis, des priesters tot ^* Heliopolis,)

* thebr. On

21

Maer dit zijn Beniamins kinderen, Bela, Bechor, Asbel, Gera, Naaman, Ehi, Ros Mupim, Hupim ende Ared,

22

Dat zijn Rachels kinderen, die si Iacob baerde alle te samen veerthien zielen.

23

Dans kinderen, Husim.

24

Dye kinderen Nepthalim, Iahzeel, Guni, Iezer, ende Sillem.

25

Dat zijn Bala kinderen, die Laban zijnder dochter Rachel gaf, ende baerde Iacob dese seuen zielen.

26

Alle dese zielen die met Iacob in Egypten quamen, die van sinen ^* dgien) wt ghegaen waren (wt ghenomen dye wijuen zijnder kinderen) zijn alle te samen sesse ende tsestich zielen.

* th. lendenen

27

Ende Iosephs kinderen die in Egypten gheboren waren, waren twee zielen. Also dat alle zielen des huys Iacob, die in Egypten quamen waren tseuentich.

28

Ende Iacob sandt Iuda voor hem tot Ioseph, dat hi hem bootscappen soude dat hi hem tegen quaem in ^* Iessen)

* th. Gosen

29

doen spande Ioseph sinen wagen aen, ende trock op na sinen vader Israel te ghemoet ^* ter seluer plaetsen) ende als Ioseph sinen vader sach, ⁺ viel hi hem om den hals, ende weende aen sinen hals zeer.

* h. te Gosen

+ D

30

Doen sprack Israel tot Ioseph, Ick sal nv blijdelicken steruen, na dien dat ic uwe aensichte ghesien hebbe, dat ghi noch leeft.

31

Ioseph sprac tot zijn broeders, ende zijns vaders huyse, Ick sal optrecken, ende Pharao bootscappen, ende hem seggen, Mijn broeders, ende mijns vaders huysgesin is tot mi ghecomen wt den lande Canaan,

32

ende zijn veeharderen, Want tzijn luyden dye met vee omghaen, haer cleyn ende groot vee, ende alle wat si hebben, hebben si mede gebracht

33

Wanneer v Pharao sal roepen ende seggen wat is uwe hanteringhe?

34

so suldy seggen, uwe knechten zijn mannen dye met vee om gaen, van onser ioncheyt aen, tot hier toe, beyde wi, ende onse vaders, dit sult ghi seggen, op dat ghi luyden woonen moecht int lant ^* Iessen) want so wat scaepherders zijn dat veronweerden die Egyptenaren.

* the. Gosen

§ Hoe Ioseph sinen vader ende zijn broeders tot Pharaonem brengt ende hen wort tlant Iessen gegeuen ende tvijfde deel der vruchten coemt den coninc toe, ende iacob eedt ioseph van zijnder begrauinghe.