De Vorsterman Bijbel

[p. N6v]

DEse wercken ofte geschiedenissen der Apostelen: zijn bescreuen van Lucas Euangelist, Inden welcken datmen mach aenschouwen die fundaci ofte oorspronck, ende beginsele der heyliger Cristen kercken ende haren vortganck. Welke en schijnt metten eersten niet te zijn dan een bloote hystorie, mer ist dat wi aenmercken dat die bescriuer is een medicijn, so vinden wi dat alle dat daer in bescreuen is, behoort ende van noode is tot de medicijn ende gesontheyt der sielen.

[afbeelding]

Die vvercken ofte geschiedenissen der Apostelen bescreuen van S. Lucas Euangelist.

§ Dat eerste. Capittel.

[kolom]

1

⁺TEn eersen hebbe ic tsermoen gedaen o Theophile van allen, dwelcke Iesus heeft begost te doen ende te leeren

+ A

2

tot dien dach toe, inden welcken ghebiedende den Apostolen: welcke hy wtuercoren hadde, ouermidts den heyligen gheest, op ghenomen is, ⁺

+ Luce. 24.g

3

den welcken oeck hy hem seluen leuende ghegeuen heeft na dye passie in vele bewisingen, veertich dagen haer openbarende, ende sprekende van trijcke gods.

4

Ende mede etende, heeft haer gheboden, dat si van Ierusalem niet gaen en souden, maer dat si verwachten souden dye beloftenis des vaders, de welcke ghy ghehoort hebt (seyt hy) door mijnen mont, ⁺

+ Mat. iij. Ioan. i.

5

want Ioannes heeft int water gedoopt, maer ghi sult gedoopt worden door den heyligen gheest, nyet langhe nae dese daghen.

6

Aldus dye daer tsamen gecomen waren vraechden hem seggende. Heer, sult ghi in deser tijt weder om stellen dat rijc Israel?

7

Ende hi heeft haer gheseyt. Ten behoort v niet te weten die tijden ende puncten der tijden, die welcke die vader gestelt heeft in zijn macht,

8

maer ghy sult cracht ontfangen des ouercomenden heyligen gheests, ende sult mijn getuygen wesen in Hierusalem, ende ooc in gans Iudeen, ende Samarien, ende totter wterste van aertrijc.

9

Ende dit geseyt hebbende, is hi op genomen daer zijt saghen, ende een wolck heeft hem wech genomen wt haer ooghen.

10

⁺Ende siende hem inden hemel varen, ⁺ siet, twee mannen hebben bi haer gestaen, ghecleedt met witten cleederen,

+ B

+ Luce. 24.g

11

die welcke ooc geseyt hebben Ghy Galileesche mannen, wat staet ghy siende nae den hemel? Dese Iesus, die van v ghenomen is inden hemel, also sal hy comen ghelijckerwijs als ghy hem inden hemel hebt sien gaen. *

12

Doen zijn si weder om gecomen te Hierusalem vanden berch: die genoemt wert Oliueti, dye welck is by Hierusalem een wech hebbende des saboths.

13

Ende als si inghegaen waren, zijn si op geclommen in die eedtsael daer bleef Petrus, ende Iacobus, ende Ioannes, ende Andreas, Philippus, ende Thomas, Bartholomeus, ende Mattheus Iacobus Alphei, ende Symon zelotes, ende Iudas Iacobs.

14

Al dese volherden eendrachtelick in bidden, met die vrouwen ende Maria dye moeder van Ihesu, ende met zijn broeders.

[p. N7r]

15

⁺+ Ende in dien daghen Petrus opstaende int midden der broederen, heeft geseyt (dye schare van dien menschen was te samen by na hondert ende twintich)

+ C

16

Mannen ende broeders. Het is van node die scriftuer veruult te worden, welcke die heylige gheest te voren geseyt heeft door Dauids mont, van Iuda, welcke is geweest een leytsman der gheenre die Iesum geuangen hebben,

17

want hy mede in ons ghetal ghetelt was, ende ghecregen hadde een deel van desen dienst.

18

Ende dese heeft een acker beseten van tloon des boosheyts, ende gehangen zijnde, is int midden geborsten, ende al zijn ingewanden zijn wt ghestort. ⁺

+ mat. xxv.a

19

Ende het si bekent geworden al dye te Hierusalem woonen, also dat dye acker ghenoemt worde, in haer ghemeyn tale Acheldemach, dat is acker des bloets.

20

Want daer staet gheschreuen int boeck der Psalmen. ⁺ Laet haer woonstadt woest worden, ende laetter nyemant zijn dye daer in woont. ⁺ Ende laet zijn bisdom een ander ontfanghen.

+ psal. 68

+ psal. c.viij

21

⁺Daer om ist van node, datter een, die tsamen met ons een getuych si zijnre verrisenisse, gestelt wort wt dese mannen, dye met ons gheconuerseet hebben al die tijt dat Iesus een ghestadige conuersacie met ons ghehadt heeft,

+ D

22

beghinnende van Ioannes doopsel tot den dach toe, in welcken hi van ons ghenomen is.

23

Ende si hebender twee gestelt Ioseph, die genoemt is Barsabas, die mede ghenaemt is die rechtuerdige, ende Mathiam.

24

Ende biddende: hebben si geseyt. Ghi Heer, die welcke alle herten bekent: toont, wie ghi wtuercoren hebt wt dese twee,

25

eenen tontfangen dye plaetse van desen dienst, ende apostelschap, daer Iudas ouertredende wt gheuallen is, op dat hy in zijn plaets comen soude.

26

Ende si hebben die loten haer ghegeuen, ende tlot is geuallen op Mathiam, ende is toe getelt dat ghetal der Apostelen. *