Der Vrouwen-peerle. Dryvoudighe Historie van Helena de Verduldighe, Griseldis de Saechtmoedighe, Florentine de ghetrouwe

Griseldis vertreckt uyt het Palleys.

GAutier die jammerde haers so seere dat hy wert schreyende, maer hy keerde hem om dat zy 't niet mercken en soude, ende ten eersten dat hy doen spreken mochte, seyde hy: Houdt, ende neemt dese kleerkens, dies sy hem bedanckte. Griseldis soo hercleet zijnde, ginc ende scheydde met bloote voeten, ende met den blooten hoofde uyt den palleyse, ende alle dat volck volghde haer na al schreyende ende

[fol. C5r]

beklaghende dat haer de avontuere alsoo contrarie ghevallen was. Ende die voorseyde Vrouwe die quam al stil swijghende, ghedoogsamelijck ende goedertierlijck voor haer Vaders dore: die welcke seer out was, ende traech, ende hadde van dier tijdt dat sy uyt haers Vaders huys ghinck, altoos gewacht, ende wel gehouden haer oude habijt dat sy uyt dede als sy van hem schiedt want hem lach altoos inden mont dat het alsoo komen soude alst wt quam. Ende als hy dat gheruchte hoorde vanden volcke voor zijn deure, soo sach hy uyt, ende vernam Griseldem zijn Dochter, in sulckenen staet als voorseydt is. Doen keerde hy in zijn huys, ende hy haelde daer haer oude kleederen, die sy te voren placht te draghen, ende daer soo bleef sy een luttel tijts, dienende haren Vader ootmoedelijcken, ende onderdanichlijcken met alsulcken reverentien ende eere, bewijsende groote neersticheyt als sy oyt te voren ghedaen hadde.