Gautier ghelaet hem te trouwen een ander vrouwe, ende Griseldis dient inde feeste de gasten.
BInnen desen middelen tijde, so ghenaeckten seer den lande van Salusen die Grave, ende die Gravinne van Buenen die met henlieden brochten die voorseyde kinderen daer af dat die Dochter hiet de Bruyt vanden voorseyden Marck grave geheeten Gautier. Ende daer liep groote mare vander bruyloft, ende vander groote feesten die daer wesen soude. Des daeghs te voren eer dat sy quamen, ontboot Gautier voor hem griseldis: de welcke voor hem quam, ende hy seyde haer: Ic wille dat dese maget die mijn huysvrouwe worden sal, eerlijck sy ontfanghen, ende sy sal morghen ter maeltijt hier zijn, ende die Heeren, ende Vrouwen komen met haer, ende sullen elck na haerder weerden worden ontfanghen. Ick hebbe u hier toe geordineert, al is't dat gy qualijcken ghekleet zijt. Neemt hier af den last ende ontfanght mijn gasten ghy kent wat mijn manieren zijn. griseldis antwoorde hem soetelijc, ende seijde: Heere, ick salt gheerne doen met goeder herten, ende begeerten, ende wat dat ghy my wilt bevelen sal ick volbrenghen nae mijnder macht, ende te hant nam sy eenen bessem, ende andere instrumenten, ende ghereedtschappe om het huys schoon te maecken ende die sale, ende daer naer ghinck sy ordineren om te stellen die tafelen ende schragen, ende gaf den anderen dienaers goet exempel om desgelijckx te doene. Des anderen daeghs soo quamen die voorseyde kinderen met den grave, ende gravinne van Buenen, daer tegen alle dat volck ginc meynende dat dese voorseyde kinderen toebehoorden den voorseyde grave, ende gravinne van Buenen, ende saghen die voorseyde maghet ten grooten wonder om haer schoon-
Auteursrechtvrij