Gründtlicher Bericht, ob Zauberey die argste vnd grewlichste sünd auff Erden sey

Das I I I. Capitel.
Die Zauberer vnd Zauberinnen seynd ärger als Juden.

1. Die Juden erkennen vnd ahnbetten einen Gott, der Himmel vnd Erd erschaffen hat: irren aber darinnen, das sie Gott nicht recht erkennen, vnd die H. Dreyfaltigkeit nicht annemen noch bekennen wöllen.

Die Christen oder getauffte zauberer vnd zauberinnen haben die Heilige Dreyfaltigkeit erkant vnnd bekant, aber haben nun den lebendigen, einigen, wahren Gott, der einfach in der Natur ist, vnd dreyfach in Personen, nemlich Gott den Vatter, Sohn, vnd Heiligen Geist, in dem sie getaufft, vnnd zu Christen worden seind, von Sünden abgewaschen vnnd ausz des Teuffels gewalt vnnd Hellischer verdamnusz erlöszt vnd zu Kinder vnd Erben des Himmels gemacht worden, denselbigen, sage ich, haben sie, dem Teuffel zugefallen abgesagt,

[p. 8]

verleugnet, vnd an statt desselben ehren vnd anbetten sie den Hellischen feind. Nun ist grewlicher Sünd den erkanten vnnd bekanten Gott verleugnen, als Gott nicht recht erkennen oder bekennen. Es ist grewlicher Sünd den Teuffel selbst an Gottes statt anbetten, als Gott nicht recht erkennen, oder anbetten wie sichs gepürt.

2. Die Juden haben zwar Christum gecreutziget, aber als einen pur Menschen, vnd als ⁺iren feind. Dann hetten sie Christum recht erkant, sie solten, wie S. Paulus sagt, den Herren der Herrligkeit nicht gecreutziget haben.

Die getauffte Zauberer vnd Zauberinnen aber die haben Christum erkant fur Gott vnnd Mensch, für ihren Erlöser vnd Heilandt, seyn in seinem Blut getaufft vnd erlöszt, von ihme Christen geheissen: vnd gehen vnd daruber vnd verleugnen Christum, dem teuffel zugefallen, vnd bewilligen in die von den Juden beschehene creutzigung, vnnd so vil an ihnen, creutzigen sie Christum vil schendtlicher vnd grewlicher, als die Juden jemahln gethan, vnd das nicht ein, sonder als offtmaln sie ire teuffelische beykümpsten haben, vnd grewliche laster begehn.

3. Die Juden was sie, vermög ires gesetzs, thun, das thun sie irem vorhaben vnd meinung nach, Gott zu dienst vnnd ehren, Gott zu gefallen, vnd von Gott gelohnet zu werden: wiewol es alles vergeblich ist, weil sie Gott nit recht erkennen, vnd in seinem Son Jesum Christum nit glauben, noch das gesetz nit im rechten verstand halten.

+ 1. Cor. 2.

[p. 9]

Die getauffte Zauberer vnd Zauberinnen, richten all ir thun vnd lassen Gott zu speit vnnd vnehren, den sie zwar erkant, aber nun verleugnet vnd verlassen haben, vnd hergegen dem verpflichten teuffel zu ehren vnd wolgefallen, dem sie sich als ihrem Gott, verpflicht vnd ergeben haben.

4. Die Juden quatenus tales hassen vnd fliehen den teuffel, als ein Erbfeind des menschlichen geschlechts, haben auch keine gemeinschafft noch freundtschafft mit ime, vil weniger Buliern vnd Huriren sie mit dem teuffel sichtparlich vnd personlich.

Die getauffte Zauberer vnnd Zauberinne hassen Gott vnd sein gebott: lieben vnnd ehren den teuffel, vnd treiben mit dem teuffel in sichtparlicher gestalt vnd persönlich ire grewliche erschröckliche vnkeuschheit.

5. Die Juden stehen ires gleichen beuor, vnd seind einander behülfflich, vnnd ob wol sie die Christen vnd frembden, so keine Juden, mit Wucher vnd sunst zu betrüben keine schew tragen, so thut doch gemeinlich ein Jud dem andern das nicht.

Die getauffte Zauberer vnnd Zauberinne die beschädigen, betrüben vnnd verderben vorsetzlich vnd am meist, ja wol allein, so vil ihnen müglich ist, durch hilff vnd mittel des teuffels, ihre etwan mit Christen, vnd mit denen sie einen Gott, einen Glauben, einerley Sacramenten gehabt, &c.

[p. 10]

Derwegen dann die Zauberer vnd Zauberinnen vilfach gottloser vnd ärger seynd, als die Juden sein können.