Gründtlicher Bericht, ob Zauberey die argste vnd grewlichste sünd auff Erden sey

Das X V I I I. Capitel.
Das die Zauberer, vnnd Zauberinnen ärger seynd, als die Mordtbrenner.

1. Ob wol die Mordbrenner gantz schedlich vnd schewlich, vnd andere verderben, da sie selbs kein profeit an haben, so seyn doch die zauberer vnd zauberinnen ärger. Dann die Mordbrenner gemeinlich noch Gott nicht fürsetzlich, vnnd ex professo abgeschworn, vnd sich dem teuffel gentzlich mit Leib vnd Seel, vnd deszfals ewig vnd erblich ergeben:

Die Zauberer vnnd Zauberinnen die seynd ex professo Gott abgewichen, vnd dem teuffel, als irem Gott samen zugefallen, vnd mit Leib vnd Seel ewig verbunden.

2. Die Mordbrenner haben auch nicht, quatenus tales, mit dem teuffel sichtparlich, vnd persönlich mit bulirung zuschaffen:

[p. 36]

Die Zauberer vnd Zauberischen bulirn persönlich vnd sichtparlich, mit dem erbfeind Gottes, vnd des Menschlichen geschlechts.

3. Die Mordtbrenner betrüben iren nechsten entweder ausz miszmuth, wegen erlitten vnrechtes oder wrachgirigkeit, hasz vnd zorn:

Die Zauberer vnnd Zauberinnen betrüben vnd verderben nicht allein einem oder etliche, nit allein ihre feinde, vnd dardurch sie beschediget, oder verunrecht mochten seyn, sonder auch ihre freund, oder die inen ire lebtag kein leid gethan, auch land vnd leuth, nicht allein auch ausz hasz des nechtsen, sonder auch ausz hasz vnd zu trutz Gottes, zu dienst vnd lieb ihres bulen, des verfluchten teuffels, vnd wanneh es an inen stünd, solten sie die gantze Welt, so nicht mit inen, dem teuffel gleichfals, dienet im grund verwüsten, vnd allenthalben verderben.