Gründtlicher Bericht, ob Zauberey die argste vnd grewlichste sünd auff Erden sey

Das V I. Capitel.
Beweisz vnnd Exempel ausz dem newen Testament das die Zauberer Busz thun, vnd gnad erlangen können.

DAmit ich auch ausz dem newen Testament ⁺ Exempla fürbring, so steht ausztrücklich von dem H. Luca beschriben in den geschichten der Aposteln, das einer geheissen Simon, ein grosser vnd schedlicher zauberer gewesen, vnd gleichwol auff die predig des H. Philippi glaubig, bekehrt vnd von gerürtem Philippo getaufft, vnd gleich andern vnder die Christen, vnd Kinder Gottes gerechnet vnd auff genommen sey worden.

+ Act. 8.

[p. 56]

Ja da derselb bekehrer vnd getauffter Simon, darnach wider in Sünd gefallen, das er meint die gaben des heiligen Geistes mit gelt zu kauffen, vnd S. Petrus durch den H. Geist sein hertz erkant, vnd mit seinem gelt dem fluch vnd verderbens pflichtig erkant: vnd weil derselb Simon, darnach widerumb seine zauberey geübt, vnnd wie glaubich, dasselbig dem H. Petro gleichfals nicht vnbewust: So hat er ime gleichwol die Seligkeit vnd gnad nicht abgesprochen, sonder in nicht des zu weniger zur Busz, vnnd ⁺ dasz er Gott vmb vergebung bitten solle ermahnet, vnd also zu im gesprochen:

Dein Gelt musz mit dir verdammt sein, darumb das du vermeint hast, Gottes gabe werde durchs gelt erlangt. Du wirst wider theil noch ahnfal haben an disem wort. Dann dein hertz ist nicht rechtfertig vor Gott: Darumb thu Busz (merck) für dise deine schalckheit, vnd bitte Gott, ob dir villeicht solche gedancken deines hertzens vergeben werde, dann (merck) ich sihe, das du bist voll bitter gall, vnnd verwickelt mit böszheit.

⁺Will allhie nicht melden, wie auch der heilig Paulus die jenigen welche fürwitzige, (das ist, wie etliche deuten, zauberische, teuffelische) kunst getriben hatten, vnd auff S. Pauli lehr vnnd predig sich bekehret, ire thaten vnd Sünden gebeichtet, vnd folgendts auch, zum zeichen warer

+ Act. 8.

+ Act. 191

[p. 57]

Busz vnd ernster fürgenommener besserung, allsolche zauberische Bücher, welche vber die fünfftzig tausent pfennig wert waren, offentlich verbrennt haben, zur Busz vnd Tauff angenommen hat. Welchs er, wie auch S. Petrus, nicht gethan noch gestattet solten haben, da die zauberer sich nicht durch Gottes gnad bekeren könten vnd gnad erlangen.

Vnd was ist viler wort vnnd beweisz vonnöthen? Gott berufft nicht allein alle Sünder one exception vnd vnderscheid zu Busz, mit verheissung der gnaden: sondern thut auch in specie den zaubern so wol als andern Sündern die ewige straff vnd verdamnusz bedrewen, darumb das sie keine Busz gethan. Welchs genugsam angezeigt, das sie auch so wol als andere Sünder, da sie wöllen Busz thun, zu gnaden kömmen, vnd selig werden können. Dann also stehet geschriben in der Offenbarung S. Joannis.

Vnd (verstehe, werden Gottes streng ⁺ vrtheil erfahren) die nicht gebüsset haben ihre mörderey, zauberey, noch ihr hurerey, noch ir dieberey.

+ Apoc. 9.