Gründtlicher Bericht, ob Zauberey die argste vnd grewlichste sünd auff Erden sey

Das I I I. Capitel.
Welche die Zauberer vnd Zauberinnen der gepür straffen, zeigen würcklich an, das sie Gottes Ehr suchen, vnd zu verthedigen geflissen seyn.

ES ist zuuorn vilfeltig vnnd genugsam erwisen, vnnd ohn das Landtkündig, wie Gott, vnd Gottes Ehr, vnd was

[p. 133]

Gott angehet, durch die Zauberer vnd Zauberinnen, dem teuffel zu ehren vnnd gefallen, als vil ihnen möglich, allenthalben vnnd jederzeit, wie länger wie mehr, geschendet, gelästert, vertunckelt vnd vertilget wirt. Welche Obrigkeit nun dieselb nicht beim leben, noch vngestrafft läszt, dieselb verthedigt Gottes ehr, vnd verhindert solche grewliche schendung vnd lästerung, so durch alsolche Gott abgefallene trewlose personen vnd Mamelucken geschehen, vnd bezeuget also, eines frommen Vnderthanen trewes gemüths, welcher die Ehr seines Herren, vnd beuorab seines Gottes Schöpffers, Erlösers vnnd Seligmachers, als vil er vermag, mit Leib, gut vnd blut, tausentmahl mehr, als seine eigene Ehr verthediget, vnd wissentlich, vnd als vil an ihm ist, mit nichten zuläszt, das sein geliebter, jha allergeliebster Herr von jemandt im geringsten, vil weniger von alsolchen Personen, also grob vnd vbermässig, solle gelästert, geschendet, oder verhönet werden, vnd derwegen fehret er hinzu, da er solche Gottes feind vnnd lästerer vermerckt oder gewahr wirt, vnd strafet sie also, das sie es nicht mehr thun, vnd andere auch abgeschrecket werden, das sie ihnen nachzufolgen, mit nichten sich gelusten lassen. Wie dann der Heiliger, vnd derwegen Hochgelehrter vnd belohnter Phinees, Mathatias, Judas Machabaeus, &c. gethan. Num. 25. 1. Machab. 2. 3.