Gründtlicher Bericht, ob Zauberey die argste vnd grewlichste sünd auff Erden sey

Das V. Capitel.
Welche Obrigkeit die Zauberer vnd Zauberinnen der gepür straffen, beweisen das sie ihren nechsten, vnd Vnderthanen lieb haben.

GLeich als die jenigen, ihren nechsten: vnd die Obrigkeit ihre Vnderthanen mit nichten lieb haben, welche ihrer Nechsten vnd Vnderthanen nutz vnd wolfart nicht suchen, vnd iren schaden vnd vnheil nicht verhüten helffen, da sie können, vnd beuorab, da sie es darzu nicht allein ausz Christlicher liebe vnd vnheil, sonder auch ausz befohlnem ampt vnd auffligender pflicht zuthun schuldig sein: Also auch, wer seines nechsten schaden bestens vermögens nicht weniger als seinen eigen schaden verhüret, vnd desselben nutz vnnd wolfart befürdert, vnd befürdert sehen soll, vnd solchs des zufleissiger thut, dasz er darzu amptshalber mehr als andere befügt vnnd mechtig, auch von Gottes wegen schuldig ist vnd verbun-

[p. 136]

den derselb beweiszt vnd bezeuget mit der that, dasz er seinen Nechsten, (vnd beuorab, die darzu seine Vnderthanen, vnnd als Pflegkinder seyn) von Gottes wegen wol meinet vnnd von hertzen lieb vnd werth habe. Wann dann die Obrigkeit, welche die Zauberer vnnd Zauberinnen ausz schuldigem eiffer der gepür gestraffet, anderen Christen, vnd ihrer Vnderthanen insonderheit, vilfeltigen vnd verderblichen schaden (welcher inen von den Zauberern, an leib, gut, blut, ja auch an der seligkeit zugefügt wirt oder werden kan, da sie frey geduldet) verhüten, sie auch von solchen grewlichsten laster abschrecken: jha auch dero Zauberer seligkeit, da sie anders sich bekehren wöllen befürdern, oder aber grössere verdamnusz, da sie gleich vnpuszfertig bleiben, verhindern: dann jhe länger sie leben, jhe mehr sie sündigen, vnd also grössere verdamnusz verschulden würden: Alsz ist kundtbar vnnd vnleugbar war, gleich als die Obrigkeit, welche das grewliche laster der zauberer vnnd zauberey vngestrafft, geduldet, jha auch ihren Nechsten vnnd Vnderthanen nicht lieben, sondern ihn hassen, wie auch sich selbsten: Das also die fromme Obrigkeit, welche neben andern missethaten, die Zauberer vnd Zauberinnen, wie sie verdient, vnd solches GOTT befolhen hat, straffen: Ihren Nechsten, ihre Vnderthanen, sich für ihre Person, vnnd darneben die gottlose zauberer vnd zauberinnen selbsten geistlich vnd zur selig

[p. 137]

keit, vorgerürter meinung, recht vnd von hertzen lieb haben.