Gründtlicher Bericht, ob Zauberey die argste vnd grewlichste sünd auff Erden sey

Das V I I I. Capitel.
Gott liebet insonderheit die fromme Obrigkeit, welche ausz liebe Gottes, ir ampt recht verwaltet, vnd die bösen straffet.

VNgezweiffelt liebet die Obrigkeit Gott welche Gottes ehr ausz rechtem eiffer suchet vnd verthedigt, all ir thun vnd lassen dahin richtet, das Gottes will vnd befelch vollnzogen aber (vnter welche die Zauberey insonderheit gehöret) gestrafft vnd abgeschafft wirt. Alszdann die fromme Obrigkeit Gott also liebet, vnd solchs mit worten vnd wer

[p. 140]

cken, so im leben, so in execution ihres beruffs beweiset vnd bekennet: Wer kan zweiffeln das Gott (der sunst jedermenniglich liebet, die ihn lieben, wie ausztrucklich bezeuget. Joan. 14.) die fromme Obrigkeit, die zweifach, ja vilfeltig Gott liebet, hinwider insonderheit lieb vnd werth habe, vnnd so in diser Welt ehrenreich bey allen frommen, so am jüngsten tag für aller Welt, vnd allen Menschen, für seine liebe getrewen erkennen vnd bekennen wirt? Dann so Christus von einem jeden frommen Christen sagt: Welcher ⁺ mich bekennet für den Menschen, den will ich auch bekennen für meinem Himmlischen vatter. Matth. 10. Wieuil zumehr wirt das von frommer Obrigkeit insonderheit zuuerstehen, vnd denselben für andern zu hoffen vnnd zuerwarten seyn?

+ Matt. 10.