Gründtlicher Bericht, ob Zauberey die argste vnd grewlichste sünd auff Erden sey

Das X. Capitel.
Wie Gott auch fromme, vnd die Zauberey, befolner meinung vnd massen straffende Obrigkeit, auch zeitlich gesegnen schützen, vnd belohnen werde.

NIcht allein ewig, vnd im künfftigem leben, welchs doch das principal vnd am meist zuachten, sondern auch zeitlichem gut vnd dergleichen wort Gott die Gottesförchtige Obrigkeit belohnen, welche, zu handhabung Gottes ehr vnd der gerechtigkeit, neben andern bösen, auch insonderheit, die aller gottloseste Zauberer vnd Zauberinnen straffen, vnd ausztilgen.

[p. 143]

1. Dann Gott hat ins gemein allen denen, die sein gebotter halten, vnnd willen fleissig leisten, verheissen, das er sie mit Leib vnd Seel, vnd alles was sie haben, inn vnd auszwendig, wie vnd wa sie seyn, bey tag vnnd bey nacht, gesegnen wölle, wie in die lengd zulesen. Leuit. 26. Deut. 28. Wannehe nun die fromme Obrigkeit schuldiger meinung vnd masz, die bösen straffen, vnd frommen handthaben, vnd zu dem end, die aller böseste vnd schädlichste Gottes feind vnd lästerer die zauberer mit nichten wissentlich dulden, sonder am allerschleunigst vnd scharpffsten straffen: so thun sie Gottes wolgefelligen vnnd ausztrucklichen befolnen willen, wie ob vnd offt bewisen. Ergo, so werden die Gottgehorsame Obrigkeit, alsolches segens, vnd verheissener, auch zeitlicher, glückseligkeit vnd belonung, so wol als andere, ja souil mehr als andere, insonderheit theilhafftig.

2. Gleich als Gott die böse vnd vngehorsame Obrigkeit auch zeitlich, an leib, gut, volck, erschröcklich gestrafft, darumb dasz sie die bösen vnd böszheit der gepür nit strafft, vnd die Gott zu tödten, vnnd ahm leben zustraffen befolhen, ⁺ beym leben gelassen vnd verschonet haben: Also wirt Gott hinwider die fromme gehorsame Obrigkeit, welche die Vngerechten, vnd Vngerechtigkeit, von Gottes wegen, befolner massen straffen, vnd die mit leibsstraff hinrichten, die Gott zu tödten (als dann wegen der zauberer ein sonderlicher vnd ausztrucklicher befelch

+ 1. Reg. 15.
3. Reg. 20.

[p. 144]

publiciert) zweiffels on auch zeitlich an leib, ehr, gut, Volck, vnnd dergleichen, in allem ihrem thun vnd lassen, belonen, gesegnen, glückseligen, als vil trawens zu irer seligkeit ersprieszlich vnd nützlich seyn wirt.

3. Vilfältige vnnd H. Exempla findet man in H. Schrifft, wie Gott die fromme Obrigkeit, so die bösen vnnd böszheit (welche jedoch vmb vil nicht so arg vnd schädlich gewesen, als die zauberer) mit rechtem eiffer gestrafft, hingericht vnd abgeschafft haben, mit zeitlichem friden, segnen vnd fürsput glückseliger vnd begnadet habe, wie zulesen, neben andern von dem H. Phinees. Num. 25. Ezechia. 4. Reg. 19. Josia. 4. Reg. 22. 23.

Ja auch, wiewol sonst gottlosen vnnd nicht auffrichtigem Jehu. 4. Reg. 10. vnnd andern mehr. Warumb aber ist solches geschehen vnd beschriben, dann zu trost vnd exempel frommer, vnnd der gerechtigkeit liebhabender, vnd demnach die bösen vnnd boszheit, vnd insonderheit die allerböseste zauberer vnd zauberinnen straffender Obrigkeit?