Gründtlicher Bericht, ob Zauberey die argste vnd grewlichste sünd auff Erden sey

[p. 153]

Der sibende Tractat, Von allerley Argumenten, gegenwürff, vnnd Eynreden, so wider den vorbeschehenen gründtlichen bericht, von der gepürlicher, vnd von Gott befolner straff der Zauberer vnd Zauberinnen, fürgewant werden: mit gründtlicher, jedoch als vil müglich, furtzer ablenung vnd widerlegung derselben.

WIewol ausz vorgehenden sechs Tractaten, ein jeder verstendiger Gottliebender, vnnd vnpartheischer Christ, gerad, vnd handtgreifflich abnemen, vnd erkennen kan, wie ernst vnd vnnachlessig, die hohe Christliche, vnnd Gottesförchtige Obrigkeit, neben andern bösen vnd Gottlosen Menschen, die Zauberer vnd Zauberinnen, als die allerböseste vnd gottloseste Menschen, insonderheit (so lieb inen ir Gott, ir Ehr, vnnd seligkeit, ihr zeitliche vnnd ewige wolfart ist) inhalt Göttliches ausztrucklichen befelchs vnnd beschribener Rechten, zu straffen schuldig seye, vnd niemand vrsach oder fug hat, deren im ge-

[p. 154]

ringsten zu zweiffeln, oder die Obrigkeit ab solchem nothwendigen stück der gerechtigkeit sich zu entschuldigen. So wöllen wir doch in disem sibenden vnd letzten Tractat, zum vberflusz die fürnembste eynreden, so von etlichen, entweder ausz einfalt vnd vnwissenheit, oder sunst ausz vnzeitigem vnuerstendigen, da nicht verdechtigen vnchristlichem eiffer, pflegen zu geschehen, oder sonst geschehen möchten, ordenlich nach ein ander setzen, vnd kurtzlich, jedoch gründtlich refutirn, vnd das es nötig, vnd der Leser weitleuffigern bericht begirig, zu andern bewerten Auctorn, die daruon ex professo vnd in die längd tractirt, remittirn.