Diarium van Egbert Alting 1553-1594

Dynxdach den 19^en Decembris 1553.

Szo Everdt Botterkoper, voermunt, mitten voeghden tut salighe Johan Hindricx ende Annen naghelaten kynderen eerstlyck voer den Rade sich beclagheden over Hermen Roeskens zoene Sander, dat hije hoer pupille, omtrent 14 jaeren olt sijnde, droncken gemaeckt ende sunder hoer weten, wille offt consent int hemelyck getruet hadde ende nochtans van der dronckenschap neet hebben bewesen ende oeck bevonden de pupille in hoer 15 jaer gaende, dselve to mydtvasten naestkomende vervult to wesen ende de pupille (als se myt hoer egen scryfften ende munthlyck voer den Raede belijende was) van gemantz daerto gehardet¹⁾, dan uuth vrijen wille ende de verhenkenisse²⁾ Goeds Sander getrouet hadde, daer se bij leven ende sterven wolde, al sulde se broet myt hem bedelen etc. Daer benevens want de voermunt mitten voeghden eendrachtelyck begeerden sampt der frundschaft van hoer (de daerna in geconsenteert hadden), dat men se beyden na den boecke neet wolde straffen etc. Kennen B. ende R., angesien Herman Roeskens zoene Sander ende Goessen salige Johan Hendrix dochter malckanderen (als se selffs bekennen) sunder bijwesent offt consent van Goessens voermunt ende voeghden offt hoer vrunden int hemelyck ghetruwet ende nochtans de voermund ende voegheden noch oeck de vrunden neet egentlyck daerover gheclaget noch straffe begeert, sunder hebben sulcx allene hoers plichts ende eedtz halven den Rade gheoepent ende tkennen ghegeven ende oeck de selve voermunt ende voeghden sampt de vrunden van Goessen, noemptlick de steefmoder, suster ende moye selffs naderhandt voer recht erschenen ende daerinne geconsenteert hebben. Sullen daerum Sander ende Goessen oeck alle deghene, de daermede over gewest sijn, den Rade na den boecke³⁾ ghelden elck vijff marck ende beholden stadt ende woeninghe.

1) Aangespoord.

2) Verhengenis, toelating.

3) Stadboek (P.E.T.P.V) 1. II, XXVII.