Diarium van Egbert Alting 1553-1594

Donderdach up daghe Stephani martyris 1555.

Szo Hughe Thyelmans, doerwaerder, hiir present in plaetze des substituytz van den procureur generael van Vreeslandt etc., sijne commissie ende letteren van requisitorien voer hen neet ghetoent, dan den ghevangen, genant Hoendermaghe, sunder verloff offte enighe voergaende begroetinghe van der hoecheyt deser stadt als een onbekander in ende doer derselver stadts iurisdictie, vrijheyt ende gebiede ende daerna wederumme noch binnen der stadtspoerten ende mueren bes in der herbergen gevoert ende gebracht hefft gehadt, allent noch sunder consent offte begeerte van den borgermester in der tijt etc., khunnen B. ende R. myt de heren ende frunde, hiir tegenwoerdich, sulcx ende szodane moedtwillicheyt neet voer ghuedt anseehen, dewijle oeverst ydtzundtz festdagen sijn, hebben de heren de sake uuthgestalt bes up naesten Maendage, umme alsdan gemelten Hughe een andtwoerdt te laten bejeghenen ende willen oeck midlertijdt den ghevangen in hoere hechte stellen ende mytten besten vorwaeren laten.

Nota, dat umme de voergaende raedtslaginge de gantze Raedt (uuthgesacht Johan Wyffrinck ende Wolter Szygers) daer beneven Reynt Alberda, Albert Jarges, Albert Coenders, Bartolt Coenders, Gert Hoernken, Johan Metelen, Rempt Menckema, Bart. Eelts, Albert Jarges de jonge, Joachim Ubbena, Herman Wyffrinck, Heertgen Dercks, Johan Hoernken, olderman, sampt taelmans van de Swoerne Meente ende bouwmesteren van de gilden versamlet weren ende samptlick besloten hebben, als boven verhaelt, oeck dat de 4 borgermesteren indertijt hebben Altinck an borgermester Reyndt Alberda, Albert Jarges, Albert Coenders, Bartolt Coenders, Geerdt Hoernkens etc. gesendt ende hem raetsche wijse laten anseggen up hoere guedbeduncken, dat men de sake noch in bedencken stelde bes up naesten Maendage, angeseen dattet rede festdagen weren, mede updat men muchte marcken, dat men de sake ten harten ghenomen ende neet al to lichtfeerdich voertgevaren hadde ende dat men midlertijt oeck vernemen muchte, wat gevoel under de gemeente van dat feyt wesen muchte, daerup de gemelte heren den heren borgermesteren wederumme laten anseggen, tselve hem oeck guedt ende raedtsam duchte te wesen ende daerbenevens, dat men oeck den gedachten ghevangen in der stadt hechte solde laten brengen, updat de duerwaerder daer neet mede int hemelyck en vertoghe, twelcke dan tut spot ende nasage muchte gedien, des daerna also overluydt den heren ende vrunden alle van borgermester doctor Sickinge voergeholden, de tselve samptlick approbeert ende besloten, daertho angenomen up naesten Maendage te willen weder erschijnen, woewal dennoch doe de principale ende meeste (uuthgesacht de Raedt myt de taelmans ende bouwmesteren) achtergebleven ende s Dinxdages gens gemant van se gekomen.