Diarium van Egbert Alting 1553-1594

Maendach 23 Augusti 1557.

B. ende R. verduncket nicht weynich szodane troetzmoedicheit, als de pater ende procurator vant Fraterhues een erb. Raede hebben dorven vorholden, als dat se hoeren ligger nicht en dachten in sRades handen tho brengen, daer queme dan na, wat daerna komen konde etc.; wente de pater ende procurator vorg. doch rede voerhen wall gespoert ende verstaen, woe nichtes bij een erb. Raede tut des conventes achterdeell voergenomen, dan alleene dat hoer ende der armen paupers guederen an besten verwaert, voergestaen ende verdegent muchten worden. Ende begheren oeck van des voersz. convents noch der paupers guederen heller noch penninck tut der stadt noch tot enich privaten proffijte offte vordell tho geneten. Is derhalven alnoch des erb. Raedes ernstlyke menonghe, de vorg. pater ende procurator den gemelten ligger onweygerich in sRades handen brengen offte

[p. 79]

ten gheringesten in ander luijde hande overgheven, den se des vortruwen sullen, ummedat een erb. Raedt alleene denselven ligger moege visiteren ende lecture daeraff hebben, als dat behoeren sall, ende dat also bij den pater ende procurator voersz. te achtervolgen tusschen dyt ende een Sondage naestkomende. Ende sulcx gescheet sijnde, willen alsdan een erb Raedt den fratres wederumme restitueren szodane regysteren ende boeken, als se van em ontfangen ende in sRaedes bewaer liggende sijn.