Diarium van Egbert Alting 1553-1594

Dinxsdach 11 Octobris 1558.

De gestrenghe, erentfeste, erbare ende vrome heer Johan van Ewsum, Aepke Onsta, heer Wigbolt van Ewsum, Hiddo Jensema, Edzart Rengers, Onno Tamminga, Sweer Rengers, Luell Aeykema ende Johan dMepsche, Jensema vrsz. swager, dewelcke sich gedeputeerden der gemene landen noemen, neffens en erbaren Rade up den raethuese erschenen myt szeker rekeste oder supplication,

[p. 91]

begerende en erb. Raedt wolde desulvige onbeswerlich guetlicken annemen ende verlesen laten ende daerup eyn vrundtlick bericht schrifftlick stellen ende em overandtworden etc.; soe dan de vorsz. supplicatie ghelesen ende tinholdt ende menonge van dien verstaen, is den heren ende vrunden vorg. nha rijper deliberatien ende besprekent uth bevel des erb. Rades durch den heer ende erb. borgermester doctor Johan Sickinghe mundtlyk beantwort ende weder ingesacht, woe B. ende R. em van wegen oer gherechticheyden ende derselver onderworpene landen sampt den medegearffden in Vriesslandt, binnen Groeningen wonende, gheen deputeerschup stunden, soe se neet mede van B. ende R. sampt den medegearffden in Vriesslandt, binnen dusser stadt wonende, nha older gewoenten ghedeputeert ende erwelet gheworen, kunden derhalven oeck oer angeboden supplication neet annemen, doch soe de heren ende vrunde vermeenden van de stadt Groeningen offte den olderman beswaert to worden, begheerden B. ende R. vrundtlyk, de heren ende vrunde oer beswaeringhe¹⁾) wolden articuleren ende in specie schrifftlyk uthdrucken ende overgeven, alssdan weren B. ende R. gheneghet ende oeck gentzlick ghesinnet, sich (tot onderholdinge der vruntschap ende vrede) daerin ter billickheit guetlyk vinden tlaten, tselve alsoe tmoegen gescheen, worde tho meermalen vrundtlyk van den gemelten heren ende vrunden durch den g. ende erb. borgermester doctor Johan Sickinghe begheert. Hiirup van den heren Johan van Eewsum uth bevel der anderen vrunden (als he sede) geantwort, angaende oer deputeerschup wolden se deselve tot gelegener tijdt wal vordeghenen ende wusten oeck ghene sunderlinge articulen oerer beswaringe in specie voer to stellen, anders dan se in gedachter oerer supplication gestalt ende overgegeven, begheerden derhalven tho weten, offte B. ende R. dat verbunt, tusschen Stadt ende Lande gemaket, guetlyk belevede tho underholden offte neet ende dat men se boven dat verbunde neet beswaren, ingelijk dat oldermansboeck (soe em dat onbekant ende neet beroerde) affdoen ende em up oer gepresenteerde ende overgegeven supplication een schrifftlick antwort offte bericht stellen ende overandtworden wolden. Waerup de heeren ende vrunde vorg. uth bevell des erb. Rades durch den heer ende erb. borgermester voersz. weder ingesacht, dat B. ende R. wolden sich up sodane begeerten ende voergevent bedencken ende myt anderen vrunden (de oer erbaren tselve ontdecken musten) bespreken ende wes men alsdan tho rade ende gesinnet muchten worden, wolde men den heeren ende vrunden tot gelegener tijdt guedtlyk ende vrundtlyk weder vorstendighen ende vorwittighen laten.

1) Op de landdag van 3 oktober 1558 namen de Ommelanden besluiten, welke zouden leiden tot de vorming van een eigen bestuur. Zie Formsma, Ommelander strijd blz. 41 e.v.