Diarium van Egbert Alting 1553-1594

Wonsdach den 31 Maii 1559.

Soe de gestrengen, erntfesten, erbaren ende vromen heren Johan van Eewsum, Focko Ripperda, Wigbolt van Ewsum, Gherdt Lewe, Aepko Onsta ende Hiddo

[p. 95]

Jensema bij en erbaren R. sampt T., S.M. ende B.v.d.g. up den raedthuese erschenen, begerende men wolde toelaten, se de rekenschup van de naegelaten weduwe des saeligen rentemesters doctor Hieronymus ontfangen muchten, neffens dem dat men em oeck up sodaner supplicatien, als se umtrent Martini laestleden en erbaren Rade behandiget ende overgegeven, een schrifftlick bericht stellen ende overandtworden wolden etc. daernae de vorsz. heren ende vrunde sich een weynich tijdes vertogen ende affgegaen, des sich de erbare R. sampt T., S.M. ende B.v.d.g. middeler tijdt upt vorg. voergevent der heren ende vrunde voersz. besproken ende daernae dsulve heren ende vrunde weder upkomen ende tgene hiirnae bescreven voerlesen laten: Nachdem de heren ende vrunden, dwelcke sich gedeputerden der gemene landen noemen, den 11 Octobris laestleden up derselver doemaels overgegeven supplication van B. ende R. beantwordet geworden, woe deselve B. ende R. van wegen oer gerechticheyden ende derselver onderworpene landen, sampt de medegearffden in Vriesslandt, binnen Groeningen wonende, den heren ende vrunden aldoe tegenwoerdich gene deputeerschup stunden, dwijle desulve neet mede van B. ende R. sampt de medegearffden in Vriesslant, binnen dusser stadt wonende, nha older gewoenten gedeputeert ende erwelet geworden ende derhalven derselver angeboden supplication neet annemen kunden etc., weten oeck noch B. ende R. sampt T., S.M. ende B.v.d.g. tegenwoerdich gedachter supplication neet to beandtworden, daerup de voersz. heren ende vrunde aldoe gevraget, woe idt dan mit de rekenschap solde staen, hefft de g. ende erbare borgermester doctor Johan Sickinge mundtlyk gesacht ende uuthgesproken, men hilde offte achte dat eene als dat ander; tselve alsoe, woe voersz., gescheet sijnde, hebben de heren ende vrunde vorgen. een affschrifft van tgene em voergelesen begeert ende sich andermaell durch des borgermester Sickinge anseggent een weynich tij des vertogen, waerentusschen sich B. ende R. sampt T., S.M. ende B.v.d.g. besproken ende tgene naebescreven antekenen, oeck volgendtz nha wederineyschinge den heren ende vrunden bovengescreven voerlesen laten: Dewijle de heren ende vrunde tegenwoerdich wall verstaen ende vernemen, dat men em gheen deputeerschup en staet, synt B. ende R. sampt T., S.M. ende B.v.d.g. neet bedacht noch gesinnet, desulvige heren ende vrunde uuth idtz voergelesen andtwordt een affschrifft to geven offte volgen to laten.