Diarium van Egbert Alting 1553-1594

Maendach den 12 Januarii 1562.

Ordinantie up de brouwerije.

In den eersten sall gheen brouwer vaeker als eens ter weken moegen brouwen.

Then anderden sall nemant meer als 36 mudden molts in de weke moegen verbrouwen.

Then darden mach men tot een browt van 36 mudden nemen clare weyte ofte garste ofte halff weyte ende halff garste edder 2 parten garste ende een part haver, soe een iider dat voer hem best duncket. Beholtlyk, dat nemant de voersz. tall sall moegen vermeren. Dan soe emant dat vorsz. getall wolde verminderen ende weyniger brouwen, sall he moegen doen, sunder alletijt daertho gheen meer haver nemen als de darde part.

Then vierden sall een iider brouwer van sodane getall ende mate van molt, als vorsz., moegen maeken witte ende roede bieren, soe guet ende quaet als he de tuegen ende slijten kan.

Then vijfften sall ghemant moeghen brouwen ende tappen beyde.

[p. 116]

B. ende R. sampt T., S.M. ende B.v.d.g. hebben de brouwerghilde dusse ordinantie alsoe up een versueck consenteert ende togelaten een jaer lanck ende neet langer durende. Myt den beschede und anhange, dat soe emant hiirtegens gedaen to hebben bevunden muchte worden, sal deselve de ghilde een jaer lanck verboert hebben ende ontwaert sijn.

Des sullen oeck de hoevelingen der vorsz. ghilde hiirinne tegens enen iideren nha older gewoente procederen ende myt nemant simuleren ofte doer de vingeren sien, noch oeck sunder consent eens erb. Rades nemant verloff gheven tegens tgene vorsz., bij deselve straffe ende pene als voersz. is.