Dinxsdach 23 Januarii 1565.
B. ende R. hebben Johan Lubberts ende Peter Arents, wesende van Vullenhoe, alhiir binnen der stadt gerechticheiden den stoervanck ghegundt, voerbeholden dat se den stoer, den se aldaer muchten vangen, alhiir ter marcket brengen ende verkopen sullen, doch dit allent tut des Rhades wederseggen. Hebben oeck namaels bij den heren borgermesteren, als hem dit vors. ingesecht, mede onder gelijke vorwerden begheert rubben, bruenfisch edder sallm, so ongeveerlick in de stoernetten muchten lopen, tho genieten, mit erbiedinge den erb. Raedt eene voreheringhe oder bekentnisse daervoer to willen doen offt gheven.
Soe B. ende R. up huyden den 22 Januarii durch hoer medelidtmaten des Rhades mit vlijte besichtigen laten, woerheer men gefuechlixst een fuer- edder wagenwech van Muntendam heeraff ende voert dat moer over neffens ende vorbij Sappenmeer, voert na Wolde ende na der stadt solden moegen leyden ende maken laten, hefft men dat selve moer ende torffgrunt om dat Sappenmeer ende voert op andere plaetsen, daer de wech solde moeten hendurch ende over dat voersz. moer loepen, so diep ende onaffgrundich bevonden, dattet der stadt neet moegelijck, darwerts heer sodanen wech to maken edder leggen to laten.
Borgermester Bartolt Coenders is up dage Conversionis Pauli den 25 Januarii in den Heren gerustet.
Auteursrechtelijk beschermd