Diarium van Egbert Alting 1553-1594

Dinxsdach 6 Novembris 1565.

Doctor Jacobus Syderurgus hefft voer een erbaren Raedt gesecht, woe he over 200 breve gevonden in een stenen pot omtrent den olden private in der

[p. 148]

muere tusschen Everardus ende hoer hues, weren meest Latijnsche, oeck scheydebreve west, van olde geslachten ende rechtinge meldende, daer vellicht sommigen wal an gelegen, so men de geslachten kenden, onder anderen een Latijnsche breeff mit 3 ½ segelen, daer Hunsegesegel mede west, de oldermanno et genus mercaturae etc., meldende, dat heer Johan Nicolai eertijts heer des hueses ende mach wal secretarius oeck west sijn, alst schijnt; secht, dat he den pot en stucken geworpen hen upter straten ende de breven nu in een kiste onder sijn ander breve gesmeten, hadde up de breve geen acht geslagen, dan hadde na gelt up den boden getast, daer sijn broder Johan bij gewest; meende datte stadt wal voel beter breve hadde.

Als nu de borgermester mit sijn bijsitteren mit den doctor to der kisten gegaen ende neet dan 3,4 olde breven onder anderen daer bevonden, is oeck de vader Hinrick van Lingen ende Johan voersz. verbodet; sachte pater, he wuste so nouwe neet, waer de plaets is, off waer de breve in gewest, off waer de nu sint, kan lesen noch schrijven, de maget off dochter moegen daerbij west sijn, weet neet, dat sijn soenen Johan daerbij gewest, secht bij sijn borgereedt, dat he de pot neet geseen, se hadden wal gesecht, een pot met breven gevonden tsijnde, dan de kinder hadden daer om lachet; Johan weet so nouwe neet, waer se de doctor vonden, he hefft se neet geseen, weet neet, waer se in gewest off wanneer se gevonden, hefft geen pot geseen, hefft daer oeck neet bij gewest, hefft van de pot neet hoert, doch wal gehoert van olde breven, dan neet dat se gevonden solden sijn. Taelmannen ende bouwmesteren totten doctor upt nije sael gesant, secht voerhandts, se neet to weten, wol de breve wal doerseen off mitten syndicus ende secretarius visiteren. 7 October^a) doctor, bij den Raedt, Swoerne Meente geropen, secht, dat se hen ende weer liggen, hefft alleenen de borgermesteren in een regyster tekent, heft upt dander neet gedacht, an de breeff van 3 ½ henck een kerckensegel, dan stonden geen borgermesteren in, weshalven he daer geen acht up geslagen; he weet nu neet, waer se is, dan hoept, se noch wal te vinden, de kamer hefft ongesloten west, sus weet he neet, off he se sal koenen vinden, dan secht, dat he van Hinrick Ulger voele olde breve gehadt, daer dunckt hem, dat he ene van de beyden gevonden. De doctor is int Schomakersgat¹⁾ ende pater ende frater elck up een poerte gesat. Postridie Johan noch gesacht, he geen pot geseen, dan dat Hinrick Knotte sijn vader int hemelick gevraget, woer doch de doctor de olde breve van 200, 300 jaren mucht gevonden hebben, he hefft dat hues helpen ondervangen ende graven, dan sulckes neet gevonden, offt anders van enigen olden breven gehoert dan voersz. Angesehen dan de doctor naderhant oeck selffs bekent, dat sijn broer daer neet aff wuste, noch daerbij gewest, hefft men de beyden laten gaen ende des doctors kiste in sijn egen tegewoerdicheyt upt raethues in presentia omnium visiteert, oeverst neet sunderlings gevonden.

14 November. Als nu gesacht worden, dat de doctor de breeff seker persoen verkofft, hefft men em noch hemelick ende openbaer int goede ondervraget, he oeverst wanckel ende onstantafftich in sijn rehede bevonden, doch alnoch bekant, he sodane breeff gehadt, daer Folkermanni in Groningen, mercatoren ende so wat ingestaen, dan hadden quelliken koenen lesen ende weet nu oeck neet, waer de is, dan de pot had so groot neet west, weren oeck neet al versegelde breve,

a) November?

1) Gevangenis in de kelder van het raadhuis.

[p. 149]

dan papiiren breve, hadde se in een stiipgat¹⁾ gesteken, ander verbrant, verworpen, wust neet, waer se gebleven, haddet mer voer een schijn gesecht, dat hij de breeff van Zelwert in een pot gevonden, hefft den voersz. breeff wal bij sijn olderen, bij tfuer sittende, gelesen, hefft so voele neet in de pot gevonden, sede 7 Novembris mede, dat he de potbreve in der sonne ende anders droeget ende schoen gemaket, dan wust nu neet, woer he den pot hen gesmeten ende 6 die hadde he gesacht, den upder straten geworpen thebben, sede nu oeck, dat so voele breve in den pot neet gewest weren, als vorsz., he had se neet getelt etc.

Want he dan sus wanckell mit voel meer ander reden ende wederreden ende in sijn woerden neet bestendich bevonden, is besloten em ter scherper examinatie te stellende ende want de sake et corpus dusser stadt anginge, hefft men neffens den borgermester ende sijnen bijsitteren verordent 1 taelman, 1 boumester, 1 uuth de Swoerne Meente ad horam postmeridianam daerbij to sijnde, doch onder protestatie de non preiudicio, daer de Raedt acta heft van begeert, dat oeck verwilliget, als volghet:

Acta de non preiudicio.

Soe doctor Jacobus Siderurgus, anders Ambult, een erbaren Raedt seker vidimus, sprekende van dat Selwert der iudicature ende tgerichte vant Goerecht ende Woltrecht onderworpich, mit noch een ander vidimus in den 4 dach na den ander gedateert ende beyde mit Zweder ende Jacop opgetekent, voer een wedervoreheringe overantwoerdet ende daerna so upter straten so in wijnhusen ende anders allenthalven verbreydet ende gesacht, een pot mit over 200 Latijnsche ende ander olde breve onder der eerden in een olde muere int graven ende breken derselver gevonden thebbende, daer dan eenen, mit 3 ½ segele ende mede met Honsegesegel bevestiget, onder gewest, daerin gestaen de oldermanno et genus mercaturae etc., ende so he na versaeket, de breven alnu te hebben off to wetende, waer de gebleven ende midtsdien seer wanckel ende onstantafftich bevonden, oock neet geloefflick, sodane breve onder de eerde in der muere bevonden tsijnde ende midlerwijle grote ende starcke suspicie ende sprake ginck, oeck den Rhade int hemelick angebracht, dat he de breve der stadt wederparten verkofft solde hebben ende noch wal weder to bekomen solden sijn, went he de waerheyt entdecken wilde, waer he de gekregen ende gelaten, sint daeromme de samptlicke heren ende vrunden eendrachtlick entsloten ende benoedight, em ter strenger examinering te laten komen ende want der ghemene stadt beste ende walfaerth hiir insunderheyt an gelegen, alst scheen, hebben B. ende R. voer guet angesehen, één taelman, één uuther Swoerne Meente ende éénen bouwmester mede bij der examinatie gefueght to wordende, mit expresse protestatie nochtans ende voerbeholdt, dat de heren B. ende R. ende de oevericheyt dusser stadt in kumpstigen tijden hiirmit in hoer recht ende hoecheit ongepreiudicieert, ongeswecket ende onverkortet wesen ende blijven sullen ende is also belevet ende besloten, dat men hiiraff behoerlyke acta maken ende tho boeke stellen solden, omdat sulckes hiirnamaels in ghener consequents gefuert offte getogen solde moegen worden. Aldus gedaen belevet ende besloten bij den samptlyken heren ende vrunden B.R., olt ende nije, T., S.M. ende B.v.d.g. den 14 dach Novembris 1565.

1) Stiep = gemetseld onderstuk waarin een steunpaal gezet is.