Diarium van Egbert Alting 1553-1594

Maendach 5 Novembris 1571.

Nadat doctor Francisco Mucero de rectoerschafft van St. Martensschoele (soe durch doctor Ennium Elchium affgestaen) guetlick weder gedefereert ende midlerwijle questie tusschen em ende den anderen preceptoren des schoelgeldes halven erresen, sijn up huyden de dre heren borgermesteren, Rolteman, Ubbena, ende Clandt (Schaffer in legatione absente) mit twe capitelsheren eerst in der karcken erschenen ende aldaer dr. Franciscum bij sich erfurdert, hem onder anderen voerholdende, woe de heren voer geraedtsampst insegen, de praeceptoren hoer schoelgeldt van den discipulen selffs na older wij se ende woenheit boeren ende heel genieten soellen. Als oeck den selven praeceptoren voert verwittight ende angesacht, daer mede bij fuegende, dat de heeren, soe tegens den rectoer, soe tegens de praeceptoren, de saecken van den salaryss dier fuegen dechten tho befurderen, dat se desfals beyder wegen een guet benoegen werden dragen.

Hiirup volgendts na der schoelen gegaen ende nadat doctor Franciscus heeruuth geesschet, is he tusschen den oldesten heren borgermester ende eene der capitelsheren, mit sampt den anderen heren in der schoelen in tegenwoerdicheit der anderen 4 praeceptoren ende der gantsen joeght solemniter ingefuert ende staetlyck introduceert worden, alwaer dan der heer borgermester denselven dr. Franciscum Mucerum den anwesenden sampt ende sunderling tot enen rectoer gepraesenteert ende commendeert, hoer allen mit ernste ordinerende ende bevhelende, hem voer enen rectoer tho accepteren ende oeck gehoersam tho wesen, woe dan gelijcksfals de rectoer daertegens vermaent geworden, sich mit ende tegens den magistren ende jongen der geboer nah te willen dragen ende holden ende alsoe in vrede ende enicheit leefflick ende freundtlick mitten ander converseren ende ommegaen, mit dem anhanck, soe emant gemelten rectoer in sijner bedieninge wederspennich ende ongehoersam bevonden, dat een erb. Raedt hem tegens sulcken een scharm ende hoefft sijn werde. Ende na de rectoer woe oeck de praeceptoren sich in aller behoer ende billickheit de eene tegens den anderen verclaert ende erboeden, sijn lestlick den scholieren feriae entheten ende de heren voert weder vandaer entscheyden. Actum Maendages ad primam pomeridianam den 5 Nov. 1571 voerg. Nota, dat Dⁿ. Schultetus Schotensis als rectoer succedeert ende ingefuert den 10 Aug. 1587 ambobus pastoribus praesentibus mit 3 consulibus ende syndico, borgermester Rolteman egrotante^a).

a) Deze nota staat in margine.