Sondach 16 Martii 1572.
Soe der heer coronell durch den heer lieutenant den heren borgermesteren laten voerdragen, dattet behoeren soll, de examinatie ende executie der gevangen voergen. (soe voel der Duetschen anginge) durch de magistraet van der stadt hiirbinnen to gescheende; soe neet, dat men gemeent, der stadt de to bevelen, bes bij sijn Ex. daerinne verordnet; - tselve in bijwesent der heeren hoefftmannen etc. - Hiirup de van der stadt sich verclaert ende a prandio laten inbrengen:
B. ende R. sint wall geneight (woe noech onlancks ende meermaels gescheen) zeerovers ende ander oeveldaeders, soe binnen dusser stadt ende stadtsgebiede misdaen offte angegrepen, na geboer tho berichten ende straffen to laten, derwijlen oeverst tegenwoerdige gevangen van buten de limiten deser stadt ende stadtsjurisdictie sint hiir gevencklyck ingebracht, solden B. ende R. wall begheren, hem de medebedieninge der justicie over deselven ende diergelijcken muchte genedichlick verlaten worden. Soe veer oeverst jummer de genedige wille ende wallmeninge van Con. Mat. ende sijn excelle. sulcx muchte sijn, dat neffens den gestrengen heer coronell sampt de heren Lieutenant ende Hoefftmannen oeck B. ende R. assistentie in sodaner justicie van gevangen als voerg. sullen behoeren tdoende, werden se sich oeck daerinne dragen ende holden, alst behoeren sall.
Hiirup der heer coronell zich als een frunt der stadt verclaert, de oeck den heren van der stadt hoer reputation ende hoecheit neet to verringeren gemeent, derwegen em sulcks angegeven, des em oeck neet weyniger als der overicheit in anderen steden competeerde, sodane publycke deven to berichten, stellende dennoch lestlick den heren heim, off et sijn Str. allene offt mitten lieutenant doen soll, neet twijvelende, den hertoch sulcx neet gevallen werde, derwijlen een magistraet hiir weere, den idt doch behoeren soll, derwegen gantslyck misradende, sulcks an sijn Ex. gelangen to laten.
Den rottmestern, soe sich der ongewoentlycken penaelverdaginge halven des deeckens, den anbestemmeten seendt belangende, beclaget ende voerstandt gefurdert, is weder ingesacht, woe der stadts geswoerne daer rede voerhen alles in gedaen, des na gelegentheit em moegelyck gewest, dan weere evenwall buten hoer voertgevaren geworden, wusten wijder neets fruchtbarichs in der saecke tho verschaffen.
Auteursrechtelijk beschermd