Diarium van Egbert Alting 1553-1594

Wondsdach 24 Septembris 1572.

Also noch huyden woe dan oeck ghyster ende eergyster de borger tot groten hoeren schaden ende oneheren durch den heren lieutenant ende Bustamante bij der sonnen uuth der stadt sunder erthoeninge van commissie offt eniger oersaecken meldung slechtlyck verwijset ende derwegen voel jammer ende karment doer de stadt ende principalyck bij den geswoernen erhoert, de oeck vast oeres ampts hoechlick vormaent geworden, den borger in hoer onschuldt voer to staende etc., sint desfals de heren des Rades mittenanderen, woe voer, an de voersz. 2 heren upter kamer gegaen, aldaer voerdragende, woe dat gemelte borger, anhe allen twijspalt offt onlust an to richten, sich gants still ende vredelyck mitten soldaten deser langen besettinge geholden, alle lasten ende swaricheiden derselver mit geldt ende onderholdt steedts vorduldich gedragen, soedat die billicx neet dan voer goede vroeme borgeren sollen behoeren angesehen te wordende, woe se de oeck bij eedts plicht niet anders tho achten gewust, bijsunders de sich noch oeck tot Con. Mat. gehoersam ende denstwillicheit in alles na hoeren vormoegen am hoeghsten er biedende weeren etc.

In anseung dan sijn furstl. Ex^e. oer samptlyck over den borger deser stadt in der bedieninge gecontinueert ende se dan denselven in desen soe voel moegelyck muchten vull edder genoech doen, solde derwegen wall begeren, gemelter heren commission desen angaende tho sehende ende em gecommuniceert tho worden, sich kumpstichlyck daermit in den besten tho vorantwoerden.

Daer ongeferlick weder upgesacht, woe de borgere om gener onvroemicheit vorwijset, solden oeck in deme oerer eheren onvorkortet blijven, sunder dat dit alleene voer een sekeren tijdt alsus geschege, woe gelijcksfals in anderen steden na dordinantie van sijn F. Ex^e. des alsoe bescheen, daermit meerder vruntschafft ende hiirbinnen muchte erholden worden, hedden oeverst geen bevelch oer commissie hiiraff tho verthoenen, dan woldens an den heren coronell gelangen laten, mit erbiedung alles der borger wille tdoende, wes em moegelyck ende dat ment ander wegen versuecken solden.

[p. 224]

Ende want hiirna voerts den stillestandt bes bekomenen antwort begeert, bijsunders soe oeck de stadt rede an sijn Gest. gescreven etc., is tselve vorgunt, als van morgen ende overmorgen ende volgents dier tijdt tho upthoholden, doch wes huyden gescheet, must sijn voertganck gewinnen.

Nota, dattet rede al 4 personen bevoerens durch een hoefftmansdiener ende een soldaet iider in hues angesecht, se sich bij der sonnenschijn verseen solden bij lijffstraffe, woe se verclaert.