Diarium van Egbert Alting 1553-1594

Vrijdach 16 Januarii 1573.

Instructie, waernae Peter Cornelius als ontfanger van des landtz acchijse hem selven sall hebben to reguleren.

[p. 233]

In den eersten, dat he acchijsmester vorgesz. van den 18 Decembris deses jaers 72 ontfangen sall all de penningen van den Omlanden koemende, tzij van Groeninger bieren, vrembde bieren, tbrouwen in den Omlanden und inbrouwen bieren, wijnen, brandewijnen und van alles, dat daertho hoert offte ancleven mach. Van gelijcken up tontfanck aller der vorsz. penningen ceelen uuthgeven und deselve mede eenen iider toe boecke stellen met namen und toenamen der tapperen und uuthslijters met oeck uuthdruckinge der woenplaetse derselver.

Voerts alle Sondage in handen van des landts rentemester alle de penningen in den naestvoergaende weecke bij hem ontfangen, neet uuthgesundert, overleveren.

Und dan noch alle moegelycke vlijth und undersoeck doen, soe an den poerten, soe doer den Ommelanden, dat van denselven acchijse neet ondergeslagen en worde und tegens denghenen, de sulcx solde moegen doen, mit alle behoerlyke middelen van rechte procederen, daertho den voergedachte rentemester und oeck die in der tijdt desselve lants syndicus sijn sall, up Con. Ma^ts. camere und daer sulcks voer recht noedich sall sijn, alle hulp ende assistentie denselven axcijsmester doen schuldich sullen sijn.

Und dat alles sall de voersz. acchijsmester met sulcker vlijthe und naersticheit bewaeren und doen bewaeren, dat he evenwell up alle landtdagen und andere bijeenkumpsten, daer men hem als secretarium offte actuarium van des landts wegen sall hebben tho gebruycken, dieselve sijne dienst volgende de last, voermaels bij hem angenomen, voldoen sall, alst behoert.

Und voer dese bedieninge des axchijsmesters ampt sall de voersz. acchijsmester hebben und genieten alle jaer voer sijn salarys de summa van 100 car. gl., van dewelcke hij uuth handen van des landts rentemester alle halve jaer de helffte ontfangen sall. Dese last van de bedieninge des axchijsmesters ampt hefft Petrus Cornelius up huyden desen vijfften Decembris anno 72, um tselve als een goet getrouw acchijsmester schuldich is und behoert te doen, angenomen und daerup an den edelen und erntfesten Edzardt Rengers und Rempt Jessema¹⁾ in tegenwoerdicheit der erwaerdigen, edelen und ernvesten dn. Gherardi Ahues, abt tho Thesinge, dn. Henrici Lontzenii, abt tho Selwart, Harman Sickinge und doctor Peter van Zijll, des landts syndici, als thosamen tot desen gedeputierden, handtastinge gedaen, dat wij ondergescr. alsulckes vorclaren. Actum binnen Groeningen ten Broeren up den gastkamer up dage und jaer als voergesz.

1) = Jensema.