Donderdach 15 Martii 1576.
Nahdem Tyaerth, Alcher ende Hancko Andreeszoens, gebroederen, bevonden west, mit hoer egen schyp, mit estrick ende anders bevrachtet, te willen alleenen up Embden vaeren ende bij den borgermester van Worckum, Zegher Gherrydtzoen genant, gerichtlick verclaert is geworden, deselve voersz. gebroederen oeck alsoe harwerts ende darwerts binnenlandts mit bieren ende anders, mede oeck wal up Embden mit ghuedt ende waeren tho schepen gewoenlyck sijn gewest, als Johan Volckeers in gelijcken gesacht, sodane bieren tijdtlicx mede van hem gehaelt te hebbende, ende dan midtsdien noch anderszins neet bevonden, dat de voersz. gebroederen gesinnet gewest solden sijn, sich als zeevarende mannen contrarie den placcate butenlandts te beghevende, sijn se derwegen bij een erb. Raedt der hechte up handtgeloffte entslagen ende gevrijet worden.
Doedo Tyarcks is bij een erb. Raedt in plaets des amptmans richter der beyden Oldenampten bij provisie ende tot der heren wederseggen verordnet.
Auteursrechtelijk beschermd