Saterdach 20 Aprilis 1577.
De erntf. Reynt Huynga contra Jacob Teynge; verclaren B. ende R., dat de questiose muyrspinde sampt vensterramen mittet portael, oeck doeren, fresen eder lijsten alsmede de puttkette, iiseren rulle ende emmeren daerto wesende, samptlyck all vast warck ende alsoe een medetobehoer des huyses sijn, dan de grote kaste ende de twe beddesteden in de kameren worden voer repliek verclaert ende geen tobehoer des huyses tsijnde.
Alsoe ghysteriges dages ener mit versloten credentz van den grave van Lalaing bij Stadt ende Lande erschenen, se mundtlyck danckende voer de bewesene gunst, faveur ende waldaet an den heer van Ville etc., mit begeerten sulcks te willen continueren ende dit verstaen sijnde van enige recommendationbrieff bij enige Westfriessche sampt deser Omlanden deputeerden mit medeondertekeninge des borgermester heren Clant (binnen Leuwerden verfeerdight) ende dan B. ende R. entsloten ende durch den syndicus an de voersz. deputeerden overbrengen laten, der stadt neet raedtsam geducht sodane versueck tho hove tdoende, dan lever de saecke Con. Mats genedige wille heym to stellende etc., ist alnoch na voele disputerung bij derselver meninge verbleven ende volgendts wijder scryfftlick antwort den gesanter affgeslagen, daer er quellick (alst scheen) met gefredight west. Nota, dat der landtsyndicus mit desen gesanten uuth Westerlandt hiir angekomen ende denselven sijns gevallens instrueert gehadt, woe mede oeck ghysteren in der samptlyke heren bijwesent genoech bescheen ende vermareket worden, twelck een erb. Raedt insunderheit suspect gewest, als eets tegens der stadt daermit voergenomen ende gepractizeert te wordende.
Auteursrechtelijk beschermd