Diarium van Egbert Alting 1553-1594

Vrijdach 20 Decembris 1577, pridie Thomae.

Nahdem Asinge Entens sich onderstaen int hemelick te ontgaen, sint nahvolgende articulen ende ordinantie dem hoptman van der wacht behandet worden.

Ordinantie van der wacht tot versekeringe derghenen, so ydts in doctor Westendorps huys gelogeret.

Eerstlyck, dat den samptlycken daer in den huyse veer oder vijff dienaren sullen gestadet worden, die oeck vandaer niet sullen uutgaen dan in drengende ende noedige bottschappen, de se mit voerweten des hoptmans ende in bijwesent van twe schutten beschicken sullen ende daerna terstundt mitten selven schutten weder na den voersz. losemente ghaen. Item de koek ende kocksdienar sullen moegen in ende uuth gaen, omme den voersz. oer geriiff ende nootdrufft te bestellende, doch sullen de beyden eerst bij den Raedt geedicht sijn.

Ende sall gheen besundere wacht in den huese wesen, dan allene schiltwacht bij dage ende nachte an beyden tzijden van den huyse geholden worden, tho wetende in de Ludze¹⁾ ende achter int hoff ende in Kroepelstrate boven de ordinarys wacht voert rechthuys. Des sall de hoptman van der wacht (offt wem he sulckes wert bevelen) des morgents voer der poorten upganck ende des avents, eer de poorten gesloten, oeck alle middagen ende anders, wanneer em des noot ende guetduncken sal, in den voersz. huyse gaen ende besichtigen, offt oeck de personen daer dan noch all tegenwoerdich sint edder niet, weshalven oeck de sloetelen van buyten ant huys in des voersz. hoptmans handen tijdtlix sullen wesen ende bewaert worden.

Oeck en sal de juffer, daerachter int hoff wonende, nadat de hoptman de loese uutgedeelt, bes smorgents de schaerwacht affgefuert is, neet uuth hoer kamer offt behusinge gaen.

Nahmaels den van der Swoorne Meente tijdlix ener de sloetell ende upsicht, woe voer, bevoelen.

Landtdach upt raedthues geholden, daer sijn Gen. sijn commission²⁾ van de Generale Staten als verordenter stadtholder (beginnende van den 23 Novembris

1) Onbekend.

2) Resolutiën Staten-Generaal 1577 blz. 555.

[p. 407]

1576) Stadt ende Lande voerlesen laten, geassocieert ende neffens hem hebbende den heren van Indevelt ende den cantzeler van Overisell Uhrth¹⁾, mit begheren sich te willen daerup mitten ander resolveren. Ende sijn hiirna durch der stadt syndicus int brede verhaelt de beswaringen, rheden ende motiven der anholdinge etlycken vermeente deputeerden, midts begerende van den anwesenden to wetende, off se gemeent, derselver moetwilligen voerstell mede to wilfaren ende approberen edder neet. Hiirup de anwesende sich erst upt huys ende a prandio ten Broeren bij den ander voegende, sint lestlick na enige communicatie re infecta van den ander iider sijner wegen gescheyden. Etzlycken nochtans van de van der Marne, Uuthuysen ende Meden²⁾, voert upt Sant ende andere, der saecken (alst scheen) in den besten geneight, bint noch bij den Rade erschenen, sich tot vrede ende eendracht guedtlick er biedende.

1) Zie Formsma, Ommelander strijd blz. 91-93.

2) Uithuizermeeden.