Diarium van Egbert Alting 1553-1594

Donderdach 5 Februarii 1579.

Soe Wijenbrugge sijn staet van ordinarys ende extraordinarys ontfanck ende uuthgevent summarie der stadt overgegeven mit angehengkter protest ende verclaringe, sulcks em noch der landtschafft neet en soll preiudiciabell sijn, soe he tselve als van der stadt daerto gheenget ende gedrongen, also hedde moeten doen etc., is tselve in dier vuegen van em neet accepteert noch angenomen ende na hem dan sulcks weder behandet, hefft he terstondt een ander, sunder alsulcken bijgefueghden protest all gereet gehadt ende oeck stracx presentatie daervan gedaen, nadat de heren nu meestlick verscheyden.

Georg Rataller, president tUtrecht¹⁾, ende Caerl Roerda, raedt van sijn genaden, hebben presenteert seker credents van den heer stadtholder neffens een open brieff, mit invorwaerter supplicatie bij etlicke van de reformeerde religie deser stadt an sijn alteze overgegeven ende voert an Rataller, als commissarys in der saecke verordnet, togesonden, om uut den Raedt een van ener ende ander religie neffens em te nemende etc., sint den selven 8 kannen wijns geschicket, halff oldt halff nije, ende volgendts verordnet, tegens morgen de heren starcker te verdagen ende den beyden heren alsdan een guedtlich antwort in to brengen, woe em oeck durch Julsing verwittiget worden.

Matthias - - - - - - - - - -

Seer lieve ende bezundere. Wij senden u hiirinne gesloten copie authentiek van der supplicatie, ons gepresenteert van wegen der borgeren ende ingesetenen der stadt Groeningen, wesende van der gereformeerde religie, die wij u verzuecken ende nietemin van Con. Ma^ts. wegen bevhelen wel toverziene ende met mr. Karel Rorda, raed der graven van Rennenberg etc., ende twe die bij den magistrate van Groeningen voersz. uuyt heur collegie u zullen worden bijgevueght, wezende deene van deene ende dander van de voersz. andere religie, alle goede middelen te gebruycken ende goede ordre te stellen up dinhouden der voersz. supplicatie, in tgene de religionsfrede, hen overgesonden, (welcke u tot dien effecte zal worden gecommuniceert) concerneert offt angaet, daerto wij u geauthorizeert hebben

1) Zie N. Ned. Biogr. Woordenb. II kolom 1163.

[p. 448]

ende authorizeren midts desen, ten eynde dat, midts ghevende den eenen ende den anderen van de voersz. religie genoechdoeninge naer recht ende billickheit, de voersz. stadt in ruste ende vrede mach worden geconserveert ende ons betrouwende in desen ende tghene daeraen clevende is up uwe dexteriteyt ende trouwe. Bevelen u seer leve ende bezundere hiermede Godt den almachtigen. Uuyt Antwerpen den 22 Decembris 1578. Ondertekent Matthias. Bet N. Sille Dopscrift: Onsen zeer lieven ende bezunderen, den president van den Provincialen Rade van Utrecht Rattaller. Exhibeert den 5 Februarii 79.

Derwijlen enige in der supplication getaxeert ende sulcks oeck tegens der gemene resolutie anderwarff to hove versocht, waerup dan tegenwoerdige commissarien affgefeerdight, is een grote commotie onder tvolck gevolght, weshalven de saecke noch dytmael in stylstandt gestelt ende de heren commissarien frundlich affgedanckt.