Dinxsdach 15 Decembris 1579.
Sijn B. ende R. bij elck vendel bijsunder erschenen ende hem de missive van sijn Gen. laten hoeren, vermeldende van de stadt mit geen garnison te willen besetten noch enige ruter her in te voeren, dan allene sijn Gen. lijffwacht van 60 haeckschutten, daer neffens den borgeren seecker protest contra bonos mores laten voerlesen, als hiirna volget:
Alsoe der edel ende walgeb. graff van Rennenbergh, stadtholder etc., onder sijn Gen. graefflicke eedt ende segell beloefft, dese stadt mit geen garnisoen to besettende noch enige ruter dan allene sijn lijffwacht van tsestich schutten neffens sijn Gen. hoffgesindt hiirin tho brengen, der stadt Groeningen hoere privilegien, tractaten, vrij- ende gerechticheden, voert recht ende justicie na alse voer te laten genieten ende dan der stadts geswoernen voer raedtsampst ingesehen, dat men sijn Gen. lever mit de voersz. 60 haeckschutten solden inlaten, dan het uterste verdarff hebben to verwachtende.
Ofte nu dan enige ter contrarie van andere meningen muchten sijn, waerdoer dese stadt ende ghoede borgeren in schade, hynder ende verdriet an lijff, have edder guedt solden moegen komen, woellen de geswoerne vorgen. daervan sampt ende elck bijsunder uuthdruckelick bij desen voer Godt ende all de warlt geprotesteert hebben, als daervan vrij ende onschuldich te sijnde, gedenckende sulckes oeck kumpstichlick tho verhalende, soe ende daer des na rechte behoeren sall.
Nah dit den vendels iider bijsunder durch den gantze Raedt voergedragen, ist upten rotmesteren geschoeven, de egentlycke resolutie weder in to brengen.
Auteursrechtelijk beschermd