Diarium van Egbert Alting 1553-1594

Wondsdach 22 Julii 1587.

De gesanten Alricus Schluter, licentiaet, ende Johan Willeken etc. hoer credentzen¹⁾ van den graff Edzart ende der stadt Embden erthoent ende vormeldet, woe se ghysterigen dages hoer warning den heeren Verdugo, stadtholder, geoepent, de mede an den Raedt gewesen, sich beclagende, woe se geern neutrael sollen sitten, de Emzestroem oeck anno 85 te bevrijen onderstaen, dat oeverst de Staetsche schepe na starcker daer gecomen tot hoer grote belastinge ende dat bovendien van deser zijdt Johan Ipens mit commissie affgefeerdight, alle schepe ende goeder in Con. Mat^s. havenen her in to dringen, waerdoer dan de hoere oeck in groten nahdeel gerhaden; item dat gedachte heer stadtholder ende dese stadt van korn mit convoy vandaer thaelen gescreven, des oeck wal tot wijder onlust sol gedijen moegen, dat de vrijbuters den van Embden wijders neet sullen willen inlaten, dan tot hamel nootdrufft; item dat Lancelot de Witte oevel bejegent, sij zonder des graven ende Raedts weten gescheet, hadde sich daer erst an de magistraet behoert tbeclagen ende weer strenglick desfals gescreven west; van dat oeck de vrijbuter mit de soldaten vanhiir bes Berum int landt lopen ruten ende roven, oeck in ansehent van zijn Gen.; dat mede enich lijnwant tho Leher als Oeverisselsch guet van onse volck genomen ende prijs gemaket tonrechte; item dat twe Engelsche jongen mit flitzen²⁾ buten poorten kregen ende herwerts in der onsen schantz gefuerth. - Hiirup in alles intercessie ende bijstandt begert an den heer stadtholder Verdugo, als wegen Con. Mat^s. krijghsoeverste; hiirup een erb. Raedt sich frundtlick ende naberlick so tegens zijn Gen. als der stadt praesenteert ende erboeden, dat oeverst sodane krigsbestellinge ende overlasten ahne voerweten ende consent des Rhaedtz bescheen ende het vorsz. convoy wort ditmael noch in bedencken gestelt; werden oeck de vorsz. beswaringen mitten heeren stadtholder communiceren ende voerts in der saecken allent ten besten geern doen ende voer wenden, wes ummers moegelick.

Nota, dat de gesanten bij zijn Gen. woe oeck der heer borgermester Wyffringk ende Moysteen upten middach to gaste geladen west.

1) Zie Ingek. br. 30 juni 1587 en Eppens II blz. 518, 519.

2) Fietsen? = vleien.