Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese Lodewijcs III sonen tegen hem rebelleerden ende opstonden ende uut zijn rijke setten.
Dat LXXVII capittel.

Dese keyser, want hi van natueren seer sachtmoedich ende goedertieren was, ende sine ondersaten mit sachticheit regeerde, zijn tegens hem opgestaen mit groter vermetelheit ende rebellicheit zijn eygen sonen, mit vele princen des rijcs, versmaende hoers vaders slapheit, vergetelheit ende versumelheit, als si seyden. Van welcke conjuracie ende meuterye dat hooft is gheweest ende anlegger Bernaert, coninc van Ytalien, coninc Puppijns soen, die doutste sone was van coninc Kaerle die Grote, ende hadde hem daer

[p. 79r]

als coninc van Italien geordineert ende gesettet mit condicien ende voerwaerden, dat hi altijt sinen oem coninc ende keiser Lodewijc ende sinen nacomers kennen ende houden soude voer sijn overhoeft ende heren. Lodewijc voersiende dat dese conspiracie tot groot quaet mochte comen indien hi dissimuleerde ende dien versweech, heeft hi hemselven hier tegens vromelic gheset, ende began van thoeft, te weten coninc Barnaert, als misbrukich des Keiserlickes Majesteyts, berovende hem in den eersten van dat rijc van Ytalien, ende deden tot Aken onthoefden. Ende die biscoppen ende andere prelaten die hem hierinne gestijft ende gestarct hadden, sende hi in der ellenden. Overmits welker strengicheit van justicie zijnre sonen ende princen hat ende nijt altijt meer ende meer verwecte ende opstont, also dat zommige geestlike prelaten hem hiermede becommerden om ter neder te leggen alle materien van alsulken twist ende discoorde. Uut welker prelaten raet ende informacie keyser Lodewijc van hem sette zijn anderde wijf Judith, die Kaerls die Caluwen moeder als een oersaeck van allen quaet, mer dit doende en konde hi noch niet versachten den toornigen moede zijnre kinderen ende heren, also dat hi onlancs hierna van zijn eygen dienres in den handen zijnre sonen gelevert is, ende daerto gedwongen dat hi sine keyserlike croen of moeste leggen ende gaen in een besloten cloester, om penitencie te doen na den ordele ende sentencie der geestliker prelaten. Daer hi in sittende aldusdanige querele ende geclachte selver gemaect heeft seggende aldus: