Paeusen.
Int jaer van VIII C XXVII.
Gregorius dye IIII was dye C ende V paeus, ende sat XVI jaer. Hy was een heilich, wijs ende geboortich man, welsprekende ende seer naerstich in allen dingen den Heilige Kercke angaende. Hi translateerde ende vervoerde vele heilighen lichamen tot behoerlike plaetsen, daer sij noch rusten. Hi institueerde ende insette die hoechtijt van Allen Heyligen, dat men die vieren soude in Walslant ende Duytslant opten eersten dach van november, als voermaels Bonifacius dye IIII ingeset hadde int jaer VI C ende XC. Na vele goede wercken is hy gestorven ende tot Sinte Peters begraven mit groter eeren.