Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat grave Otte van Benthem, palensgrave, gevangen wert¹⁶⁷.
Dat XIII capittel.

Op dese selve tijt meende grave Otte van Benthem Ottenzoen van Rymmeggem, palensgrave opten Rijn, der graefinne van Hollandt Zophien broeder, deser graef Dircxs suster man, die Twenten te verwoesten; ende nyemant en dorst hem van des biscops wegen wederstaen. Ende die biscop heeft vergadert een cleyn menichte van ridderen te voet ende te paerde, daer die cappetein ende hooftman of was Huge Butterman, here van Butterslot, van Botlant ende van Spijck, ende heeft hem van des biscops wegen vromelic tegen gestreden¹⁶⁸, ende heefter vele van des graven volc verslegen; ende grave Otte van Beyle bleef dair mede doot, mit veel vromer mannen ende knechten, ende grave Otte van Benthem wert gevangen ende tUytrecht gebrocht, ende wert daer in een eerlicke ende hoessche vanghenisse gheset.

167 aldus C; ontbr. AB.

168 gesteden AB.