Hoe dese grave Otte verslagen worde van sine vianden.
Dat XV capittel
Een luttel tijts hierna worde dese grave Otte van Benthem, dye een scoen heerlic jonc man was, jammerlic verslagen van grave Harman van Staelwijck. Ende na zijnre doot is Otte van Hollant, zijnre suster Zophie, graefinne van Hollant, ende deser grave Dircs zijn anderde soen, van rechter besterfnissen wegen geworden grave van Benthem, want Florijs, zijn outste soen, verwachtende was die graefscap van Hollant. Waerom dese Otte gemaect worde grave van Benthem, na zijn oems doot, grave Otte voerseit.