Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van dat beginsel ende oerspronck der stede van Gorikom.
Dat X capitel.

Omtrent dese tijt stont bi dat dorpe van Arkel een cleyn casteelken op een plaetse genoemt Wolfare, toebehorende here Jan, den IX here van Arkel. By welcke burch doe woenden sommighe visschers. Want

[p. 161v]

die rivier van der Merwen begon daer te vloijen ende te ebben, op ende nederdalende, omdat die twee rivieren van der Wale ende Maze daer ineenvloijen, want die Wale was omtrent die stede van Tijele benaut ende geleijt, dat si haren ouden courts ende loop in der ryevieren van der Lingen nyet houden en mochte; dijergeliken was van der Maze medegedaen; ende dese visschers, omdattet een scamel ende arm volcxken was, worden si gheheten Gorrekens, waervan dat die stede van Gorrekom, mer nu Gorichom gehieten wert. Ende dese here Jan geboet alle die husen van desen dorpen van Wolfare of te breken, ende dede die mit groten onderstant²³⁹ ende hulpe weder setten²⁴⁰ by dat casteelken in maniere²⁴¹ van eenre stede, ende van den stenen die gecomen waren van der kercke van Wolfare worde ghemaect ende fondeert die parochiekercke van der stede van Gorichom; ende alle die ornamenten outaren ende beelden worden gebrocht in denselver kercken van Gorichom. Ende here Jan dede dese stede al omme bemuren mit hogen dijken, toornen, ende tijmmerde daerin een groot starck casteel, dat men hiete de burch oft palaijs van Arkel, want de heren van Arkel daer hoer woenstat voertan plagen te houden.

239 noderstant AB.

240 seetten AB.

241 mamere AB.