Hoe die coninc tot Ludick quam, ende hoe hi tot enen keiserleen uutgaf den burch ende stede van Nijmmagen, mit sinen toebehoeren.
Dat IX capitel.
Hiernae, doe alle ding tot profijt des Heiligen Rijcs ordineert was, ende die kerc van Sinte Cunibert tot Coelen in sine presencie gewijt was, nam die coninc oerlof an al den vorsten, princen ende heren, ende reysde mit here Henric van Gelre, biscop van Ludick, totter stat van Ludick, daer hy van den edelen doemheren ende andere geestelike ende waerlike personen mit groter eren ende feesten ingeleit ende in den Domkercke gebrocht wert; ende bleef daer leggen in der stat VIII dagen lanc. Ende binnen desen tiden so consacreerde ende wide dye aerschebiscop van Ruwaen, legaet des Stoels van Romen, dat Hoge Outaer van den Domkerke in der eren van Onser Lyever Vrouwen ende Sinte Lambrecht, daer teghenwoerdich waren coninc Willem van Romen; die aertsbiscoppen van Ments, Trier ende Coelen; die biscoppen van Mets, Ludick ende Cathalaunen, mit meer andere geestelicke prelaten, princen, heren ende vorsten. Ende in desen tiden, soe gaf die coninc, Otte, grave van Gelre, des biscops broeder van Ludick, van den Roemschen Rijke te lene te houden dye stede ende burch van Nijmmagen, mit allen sinen ampten, dominien ende toebehoeren. Des soe leende hi den coninc daerop XXI M marcks puer conincs silvers. Ende tot wat tiden een Roemschen coninc wederghift den grave van Gelre dese voerseide somme, so sal die stede mitter burch ende mit allen sinen toebehoren wedercomen vrij an den Roemschen Rijck, mit voerwaerden dat gheen coninc of keyser van Romen en sal dese goeden weder een ander mogen269 verlenen, die grave270 van Gelre en sal altijt die voerkoer daerof hebben. Ende dit alte