Van die electye Johans van Nassouwen, dye XXXIX bisscop van Uutrecht.
Dat VI capitel.
Als nu biscop Henric gestorven was, hebben die ecclesie der kercken van Uutrecht eendrachteliken tot enen biscop gecoren Johan van Nassouwen, een slecht, simpel ende bina een waerlick man, ende is die XXXIX biscop van Uutrecht geweest. Hi vant alle sine sloten ende castelen vervolt van al datghene dat hem van node was, ende zijn voersaet mit groter wijsheit ende voersichtichheit teghen alle sine omgheseten vianden voersien ende bescermt hadde.
In denselven jaer, op die XI kalende van januario, starf Machtelt, graefinne van Hollant, coninc Willems moeder van Romen. Dese edele graefinne worde begraven in dat cloester te Loesdunen der oerden van Cistercien, dat si selver eerst gefondeert ende gesticht hadde.