Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat biscop Willem van Uutrecht ghesleghen worde van den Hollanders.
Dat V capitel.

In ditselfde jaer so worde biscop Willem³³⁹ van Uutrecht gevangen binnen der stat van Uutrecht van here Sweer van Montfoert, here Hubert van Vianen, here Jan van Linscoten ende here Jacob van Lichtenberch, burgermeesteren, ende sat omtrent een jaer lang gevangen int huis van Lichtenberch, in der stat van Uutrecht. Ten lesten is dese biscop Willem uuter vangenisse gecomen doer hulp van enige dorpluden, mer worde nochtans uut de stat gehouden als verbannen man; ende is ghereyst over IJsel, tot sine getrouwe vrienden, van denwelken hi minliken wort ontfangen. Ende hebben hem als enen geesteliken vader eerwaerdeliken geeert ende tracteert. Na weinich tijts is hi gereyst na Romen om den paeus van Romen te resigneren ende weder over te geven dat voerseide bisdom van Uutrecht, opdat hi voertan in vreden soude mogen leven. Mer dye paeus woude dat bisdom nyet an hem nemen, ende ontboet den biscop van Monster, dat hy sinen medebroeder, desen biscop Willem van Uutrecht, sinen behulpeliken hant doen soude, ende tegen alle die rebelle die dat bisdom begeerden te crencken ende an te vechten bistant doen. Als dese biscop Willem weder omkeren soude tot sinen landen opten V dach van augusto, heft hi gesien in der stat van Anagnen een wonderlick voerteiken, dat welke prenosticeerde ende een teiken was zijns aenstaende doots. Hi sach dat de zonne stont mit II hornen, geliken een halve maen, van denwelken dat blinckende rode bloedige scijnselen oft stralen gingen, als lichte radien. Ende als hi weder was gecomen heeft hi terstont uut dat Oversticht vergadert veel gewapens volcs om te besoeken of hi in eniger manieren in zijn stat soude mogen comen. Dese dinghen hem dus hebbende, enige edelen uut Hollant, als here Henric, burchgrave van Leiden, here Dirck van Wassenaer, here Phillips van Montfoert, here Simon van Bentem, here Floris van Duven, here Jacob van den Woude, mit vele vrome wapentuers, hateden den biscop uut ander viantscap ende twedract, ende beminden heer Jacob van Lichtenberch. Dese voerseide namen haer wapenen doer begeerte dien van Uutrecht, ende bi consent ende wille des graven van Hollant zijn si gecomen op een slecht velt geheten die Hogewoert, mit ontwonden

339 Willen AB.

[p. 189v]

blinckende banieren, mit basunen, om den biscop van der stat te verdriven, ende here Jacop van der anstaender periculen te verlossen. Daerentegen heeft die biscop zijn volck in goeder ordinancien geset, want hi wel die helfte meer volcs hadde, ende is mit groter moedicheit, mit ontwonden bannieren, mit een vreselic geluit van trompetten, tegen sine vianden vromelic angetreden ende tegemoet gegaen, also dat hi in den eersten angang zommige lantluden dye van buten dat heer stonden heeft verjaecht; ende stont den Hollanderen vromeliken tegen. Daerentuschen is here Sweer van Montfoert, mit een onvermoeyt heer van volc, angecomen, ende heeft den Hollanders weder moet gegeven, ende is hem gewest een grote hulp; ende daer began enen swaren, bloedigen strijt; si slogen malcanderen uutermaten seer ende wredeliken om die victorie ende overhant te houden. Dye biscop sat op een snel ende licht paert, ende doerreet dat Hollantse heer eenmael ende anderwerf, denwelken alle dat volc ontsagen te slaen, als horen geesteliken vader ende here; mer die biscop, de noch eens derden mael sijn vianden doerriden woude, is van den paerde in der aerden geslegen, ende worde aldaer van sine ongehoersame kinderen ende ondersaten dootgeslegen op Sinte Martijns dach in den somer, int jaer Ons Heren M CCC ende een. Daer bleven doot vele vrome wapentuers ende vechters, mer aldus meest van des biscops wegen. Ende des biscops dode lichaem worde gehaelt van den heren der Hospitaliers van Sint Jans Oerde, ende worde geset in Sinte Katrinen kerke, ende worde namaels begraven mit betaemliker uutvaert in die Cathedraelkercke van den Domme. Dese biscop Willem en besat dat bisdom niet langer dan vijf jaer, die alle die dagen grote persecutien ende vervolginge geleden heft, als voerscreven staet.