Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van biscop Gwie, die XLII biscop van Uutrecht.
Dat VI capitel.

Als biscop Willem dus deerliken was verslegen, is grave Jan van Henegouwen ende van Hollant haestelyc gecomen tUutrecht, biddende dye ecclesie ende heren van den capittel voer Gwido sine broeder, tresorijer van Ludic. Enige van den heren van den capitel coren desen Gwie, thesaurijer van Ludic; andere, die coren here Roelof van Waldec, den domproest. Ende also geringe als dese Gwie dat regiment ende dominantie van den bisdom anghenomen hadde, is here Roelof, die domproest, getogen over IJsel. Ende dese biscop Gwije, overmits hulp ende bistant zijnre broederen voerseit, heeft hi alle sine adversanten ende vianden tonder gebrocht, ende sijn bisdom mit rusten ende vreden beseten ende regeert.